Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 708 Hüküm no: 773 Orijinal metin no: [118a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dimo v. Duka’nın Pınarca köyündeki yurt yeri ve çayırına müdahale ettikleri iddiasıyla Mehmed ve kardeşi Abdulbâki aleyhine açtığı davada beş yüz akçeye sulh olduğu Mahmiye-i Edirne nevâhîsinden Üsküdar nâhiyesine tabi Pınarca nâm karyede sâkin Dimo v. Duka nâm zimmî mahmiye-i mezbûrede meclis-i şer‘de Mehmed ve Abdulbâki ibney Mehmed taraflarından zikri âtî sulh ve ibrâyı tasdîka vekîl olup nehc-i şer‘î üzere vekâleti sâbite olan Ahmed Çelebi b. Hüseyin nâm kimesne mahzarında ikrâr-ı tâm ve takrîr-i kelâm edip karye-i mezbûrede vâki‘ bir tarafdan tarîk-ı âm ve üç tarafdan vâdi ile mahdûd bir kıt‘a çayır ile bir tarafdan Kalu v. Gika ve bir tarafdan Görgö nâm zimmî ve bir tarafdan Zafira nâm Nasrâniye mülkleri ve bir tarafdan tarîk-ı âm ile mahdûd yurt yeri ta‘bîr olunur arsa babam merkūm Duka’nın mülkü ve taht-ı tasarrufunda olup ba‘de helâkihî bana intikāl eylemiş iken mezbûrân bi-gayri vechin zabt u tasarruf etmekle ben dahi zikrolunan çayır ile yurt yerini mezbûrân Mehmed ve Abdulbâki’den da‘vâ ve taleb eylediğimde beynimizde münâza‘ât-ı kesîre ve muhâsamât-ı şedîde vâkı‘a olmuşidi el-hâletü hâzihî beynimize muslihûn tavassut edip beş yüz akçe üzerine inşâ-i akd-i sulh ettiklerinde ben dahi sulh-ı mezbûru kabûl ve bedel-i sulh olan meblağ-ı mezbûr beş yüz akçeyi yedinden bi’t-tamâm ve’l-kemâl ahz u kabz eyleyip zikrolunan yurt yeriyle çayıra müte‘allik da‘vâdan mezbûrân Mehmed ve Abdulbâki’nin zimmetini ibrâ-i âm ile ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis ve’l-ışrîn min-Şevvâli’l-mükerrem li-sene semân ve sittîn ve elf. Şühûdü’l-hâl: Mustafa Çelebi [b.] Mehmed, Mehmed Çavuş, Mehmed, Mustafa b. Hüseyin ve gayruhüm.