Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 709 Hüküm no: 774 Orijinal metin no: [118a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Hasan’ın boşandıktan sonra tekrar nikâhlandığı kocası Ali Çelebi b. Hüseyin aleyhine açtığı nafaka davasında haksız olduğu Mahmiye-i Edirne’de Ali Bey mahallesinde sâkine olan Âişe Hâtun bt. Hasan meclis-i şer‘de bundan akdem zevci olan râfi‘ü’l-kitâb Ali Çelebi b. Hüseyin mahzarında takrîr-i da‘vâ edip zevcim mezbûr Ali Çelebi zimmetinde sagīr oğlu Mustafa’yı ve beni bilâ-nafaka terk, cins-i nafakadan bir şey habs eylememekle bana farz [ve] takdîr ve bundan akdem müctemi‘ olan beş bin kırk akçe nafaka-i mefrûza zimmetinde mütekarrır idi lâkin mezbûr ile bundan akdem hul‘ olup tekrâr nikâh-ı cedîd ile nikâh olundukda leyle-i zifâfda nafaka-i mefrûza-i mezbûre beş bin kırk akçe da‘vâsından zimmetimi mahzar-ı Müslimînde ibrâ ve ıskāt eylemişdir dedikde gıbbe’l-inkâr mezbûr Ali Çelebi’den takrîrine mutâbık beyyine taleb olundukda udûl-i Müslimînden Abdürrahim Çelebi b. Mehmed ve Mustafa Efendi b. Mehmed el-imâm ve Sefer Çelebi b. Ahmed ve Pîrî Beşe b. Mustafa nâm kimesne[ler] meclis-i şer‘de li-ecli’ş-şehâde hâzırûn olup istişhâd olunduklarında fi’l-vâki‘ mezbûre Âişe müdde‘î-i merkūm Ali Çelebi ile bundan akdem tefrîk olunup tekrâr akd-i nikâh olundukdan sonra bizim huzûrumuzda nafaka-i mefrûza olan beş bin kırk akçe da‘vâsından mezbûr Ali Çelebi’nin zimmetini ibrâ-i âm ile ibrâ ve ıskāt eyledim deyu ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyu herbiri edâ-i şehâdet-i şer‘iyye ettiklerinde ba‘de ri‘âyeti’ş-şerâit şehâdetleri hayyiz-i kabûlde vâkı‘a oldukdan sonra mezkûre Âişe bî-vech mu‘ârazadan men‘ birle mâ-vaka‘a bi’t-taleb ketb olundu. Tahrîren fi’l-yevmi’s-sâlis min şehri Şevvâli’l-mübârek li-sene semân ve sittîn ve elf. Şühûdü’l-hâl: Ahmed Çelebi b. Mehmed, Hasan Çelebi [b.] Ahmed, Derviş Çelebi, İdris Efendi ve gayruhüm.