Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 714 Hüküm no: 782 Orijinal metin no: [120a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kosta v. Harito’nun on üç sene önce Salih ve Ali’ye sattığı bağı onların da üç bin yedi yüz elli akçeye Simo v. Mito’ya sattıkları Edirne’de Papa Kaşyanos mahallesinde sâkin Kosta v. Harito nâm zimmî meclis-i şer‘de işbu bâ‘isü’s-sifr Simo v. Mito nâm zimmî mahzarında ikrâr ve takrîr-i kelâm edip mahmiye-i merkūme hâricinde Fergana Köprüsü kurbünde vâki‘ bir tarafdan Sabuncu Todori ve bir tarafdan Melonir ve bir tarafdan Kürkçü Yani nâm zimmîler bağları ve taraf-ı râbi‘i tarîk-ı âm ile tahmînen on dönüm bağ mülkü olup târih-i kitâbdan on üç sene mukaddem Salih ve Ali ibney Hasan nâm kimesnelere ale’l-iştirâki’s-seviyye altı bin akçeye bey‘ ve teslîm edip onlar dahi iştirâ ve tesellüm ve kabûl eylediklerinden sonra semen-i mezbûru bi’t-tamâm alıp kabz edip zikrolunan bağ-ı mezbûr mülk-i müşterâları olmuşidi hâlâ zikrolunan bağı mezbûrân Salih ve Ali mezbûr Simo’ya üç bin yedi yüz elli akçeye bey‘ ve teslîm edip ol dahi iştirâ ve tesellüm ve kabûl edip mülk-i müşterâsıdır dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-[yevmi’l]-ışrîn min-Zilka‘deti’ş-şerîfe [li-sene semân ve sittîn ve elf.] Şühûdü’l-hâl: Mehmed Çelebi [b.] Sefer, Hasan [b.] Ahmed, Ali [b.] Ahmed, Arslan, Sefer b. Veli.