Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 715 Hüküm no: 783 Orijinal metin no: [120a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Marola bt. Kosta’nın sattığı bağ bedelinden alacağı olduğu iddiasıyla İsmail Ağa b. Ali aleyhine açtığı davada dört yüz elli akçeye sulh olduğu Mahmiye-i Edirne’de Yıldırım Bayezid Hân mahallesinde sâkine Marola bt. Kosta nâm Nasrâniye meclis-i şer‘-i hatîr-i lâzimü’t-tevkīrde işbu bâ‘isü’l-kitâb İsmail Ağa b. Ali mahzarında bi’t-tav‘i’s-sâf ikrâr ve takrîr-i kelâm edip mezbûr İsmail Ağa’ya bundan akdem mahmiye-i merkūmeye tâbi‘ Karaağaç nâm karyede vâki‘ lede’l-ahâlî ma‘lûmü’l-hudûd iki tahtânî odayı ve bir ahırı ve sundurmayı müştemil ve yine karye-i mezbûre sınırında vâki‘ tahdîd ve tavsîfden müstağnî altı dönüm bağımı safka-i vâhide ile dört bin yedi yüz akçeye bey‘-i bâtt-ı sahîh-i şer‘î ile bey‘ ve teslîm ol dahi iştirâ ve tesellüm ve kabûl eyledikden sonra semeni olan meblağ-ı merkūm zimmetinde kalmağla meblağ-ı mezbûru da‘vâ ve talebe şürû‘ eylediğimde beynimizde münâza‘ât-ı kesîre vâkı‘a olmuşidi el-hâletü hâzihî beynimize muslihûn tavassut edip beni dört yüz elli akçeye inşâ-i akd-i sulh ettiklerinde ben dahi sulh-ı mezbûru ve bedel-i sulh olan dört yüz elli akçeyi yedinden bi’t-tamâm ahz u kabz eyleyip mâ‘adâsını da‘vâdan zimmetini ibrâ-i âm ile ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-âşir min-Zilka‘deti’ş-şerîfe li-sene semân ve sittîn ve elf. Şühûdü’l-hâl: Ahmed Çelebi b. Hasan, Hasan b. Ahmed, Bayram Beşe b. ( ), Halil Çelebi b. Hüseyin, Mehmed b. Ömer, Ömer Çelebi b. Hasan, Derviş Çelebi b. ( ) ve gayruhüm mine’l-hâzırîn.