Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 715 Hüküm no: 784 Orijinal metin no: [120b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Ramazan b. Hacı Bayram’ın varisi olmadığı zannıyla el konulan terekesinin varisi Mehmed b. Musa’ya teslim edildiği Mahmiye-i Edirne’de Istabl-ı âmire’de yedekçi olup bundan akdem vefât eden Ramazan b. el-Hâc Bayram nâm kimesnenin li-ebeveyn ammi oğlu olup hasren vârisi olan Mehmed b. Musa nâm kimesne mahmiye-i mezbûrede meclis-i şer‘-i hatîr-i lâzimü’t-tevkīrde zikrolunan Istabl-ı âmire’de raht hazînedârı olup muhallefât-ı müteveffâ-yı mezbûra vâzı‘u’l-yed olan diğer Ramazan Ağa b. Abdurrahman nâm kimesne tarafından ikrâr-ı âti’z-zikri tasdîka vekîl olup nehc-i şer‘î üzere vekâleti sâbite olan Celeb Mehmed Ağa b. Kalender nâm kimesne mahzarında ikrâr ve takrîr-i kelâm edip müteveffâ-yı merkūm Ramazan’ın zâhirde vâris-i ma‘rûfu olmamak zu‘mu ile müvekkil-i merkūm Ramazan Ağa bi-hasebi’l-emâne yanında mevcûd olan muhallefâtını ma‘rifet-i şer‘le ahz u kabz ve sûk-ı sultânîde bey‘-i men yezîd edip bin yedi yüz akçeye bâliğ olmağla hâlâ hasren vârisi olduğum hasebiyle meblağ-ı mezbûr bin yedi yüz akçeyi merkūm Ramazan Ağa yedinden bi’t-tamâm ve’l-kemâl ahz u kabz eyleyip muhallefât-ı müteveffâ-yı merkūma müte‘allik da‘vâdan merkūm Ramazan Ağa’nın zimmetini ibrâ-i âm ile ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb sebt olundu. Fi’l-[yevmi’l]-hâdi aşer min-Zilka‘deti’ş-şerîfe [li-sene semân ve sittîn ve elf.] Şühûdü’l-hâl: Hasan Efendi el-imâm-ı Istabl-ı âmire, Ali Çelebi b. Mustafa el-müezzin, Süleyman b. Sefer, Ömer Bey b. ( ) ve gayruhüm mine’l-hâzırîn.