Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 716 Hüküm no: 786 Orijinal metin no: [120b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hıristo v. Dimitri’nin mülkü olduğunu iddia ettiği Servohor köyündeki bağın Kıpti Şirvan bt. Maden’e ait olduğunun anlaşıldığı Dimetoka kazâsına tâbi‘ Servohor nâm karyede sâkin Hıristo v. Dimitri nâm zimmî mahrûse-i Edirne’de meclis-i şer‘de işbu bâ‘isü’l-kitâb Şirvan bt. Maden nâm kıbtiye mahzarında üzerine da‘vâ ve takrîr-i kelâm edip karye-i merkūme sınırında vâki‘ bir tarafdan Ebûbekir bağı, bir tarafdan Sitalona nâm zimmî bağı, bir tarafı Rimo nâm zimmî bağlarıyla ve taraf-ı râbi‘i tarla ile mahdûd tahmînen iki dönüm bağ mülk-i müşterâm iken mezbûre Şirvan bi-gayri vechin vaz‘-ı yed eder suâl olunup kasr-ı yedine tenbîh olunmak matlûbumdur dedikde gıbbe’s-suâl mezbûre Şirvan cevâbında zikri mürûr eden bağ bundan akdem vefât eden babam merkūm Maden’den bana irsen intikāl eylemiş iken mezbûr Hıristo mülkiyet üzere tasarruf eder deyu da‘vâ ve taleb eylediğimde mezbûr Hıristo dahi zikrolunan bağı gāib ani’l-meclis Mahmud Çelebi nâm kimesneden bin akçeye iştirâ ve kabûl ve tesellüm edip lâkin zikrolunan bağ babam Maden’in mülkü olup ba‘de vefâtihî irsan bana intikāl eylediğini ikrâr edip ve bağ-ı mezbûru bana teslîm eylediğini hâvî mahrûse-i merkūmede Mahkeme-i Kübrâ’da nâibü’ş-şer‘i’ş-şerîf olan Osman Efendi imzâsıyla mümzâ ve hatemi ile mahtûme ve bin altmış sekiz senesi Şa‘bânü’l-mu‘azzamı’nın on beşinci [121a] günü tarihiyle müverraha hüccet-i şer‘iyye dahi vermişdir deyu vech-i muharrer üzere takrîrine muvâfık olan hüccet-i şer‘iyyeyi ibrâz ve merkūm Hıristo’nun muvâcehesinde feth ve kırâat olunup istintâk olundukda mazmûn-ı hüccet-i mezkûreyi bi-tav‘ihî ikrâr ve i‘tirâf etmeğin mezbûr Hıristo bî-vech mu‘ârazadan men‘ birle mâ-vaka‘a bi’t-taleb sebt ve terkīm olundu. Hurrire fi’l-yevmi’l-âşir min-Zilka‘deti’ş-şerîfe li-sene semân ve sittîn ve elf. Şühûdü’l-hâl: Ahmed b. Mehmed, Hasan b. Ömer, Ali b. Receb, Mehmed b. Hasan ve gayruhüm.