Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 718 Hüküm no: 788 Orijinal metin no: [121a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Mustafa b. Seyyid Ahmed’in tarla ve çayırına müdahalede bulundukları iddiasıyla Mustafa b. Abdullah ve Halil b. Hızır aleyhlerine açtığı davasından vazgeçtiği Mahmiye-i Edirne civarında Dimetoka nevâhîsinden Cebel nâhiyesine tâbi‘ Seyyidler nâm karyede sâkin es-Seyyid Mustafa b. es-Seyyid Ahmed nâm kimesne mahmiye-i merkūmede meclis-i şer‘de işbu bâ‘isü’l-kitâb Mustafa b. Abdullah ve Halil b. Hızır nâm kimesneler mahzarlarında üzerlerine da‘vâ ve takrîr-i kelâm edip Sultân kazâsına tâbi‘ Nusretli nâm karye sınırı dâhilinde nehr-i Burgos kenarında vâki‘ ma‘lûmü’l-hudûd olup bize eben an-ceddin temlîk olunan tahmînen yüz dönüm tarla ve çayıra mezbûrân Mustafa ve Halil bî-vech vaz‘-ı yed etmişlerdir suâl olunup kasr-ı yedlerine tenbîh olunmak matlûbumdur dedikde gıbbe’s-suâl mezbûrân Mustafa ve Halil cevâblarında karye-i mezbûre sınırı dâhilinde olup zikri mürûr eden tahmînen yüz dönüm tarla ve çayır eben an-ceddin tasarrufumuzda olup hatta mezbûr es-Seyyid Mustafa zikri sebk eden tahmînen yüz dönüm tarla ve çayır eben an-ceddin bize temlîk olunan arâziden olup zikrolunan Bergos Suyu âhar mahalden cârî olup onların karyeleri tarafında kaldı deyu da‘vâ etmişidim hâlâ zikrolunan tarla ve çayır bizim eben an-ceddin temlîk olunan arâziden olmadığı ma‘lûmum olmağın zikri mürur eden tarla ve çayır da‘vâsından bi’l-külliyye fâriğ oldum deyu mahmiye-i mezbûrede Mahkeme-i Kübrâ’da nâibü’ş-şer‘i’ş-şerîf olan Receb Efendi b. Yahya imzâsıyla mümzât ve hatemi ile mahtûme ve bin altmış yedi senesi Şevvâlü’l-mükerreminin on üçüncü günü tarihiyle müverraha hüccet-i şer‘iyye dahi ermişdir deyu vech-i muharrer üzere takrîrlerine muvâfık hüccet-i şer‘iyye ibrâz ve mezbûr es-Seyyid Mustafa’yı muvâcehesinde feth u kırâat olunup istintâk olundukda mezbûr es-Seyyid Mustafa mazmûn-ı hüccet-i mezkûreyi mu‘terif olup bî-vech ta‘arruzdan men‘ birle mâ-vaka‘a [bi’t-taleb ketb olundu.] Fi’l-yevmi’s-sâbi‘ aşer min-Zilka‘deti’ş-şerîfe li-sene semân ve sittîn ve elf. Şühûdü’l-hâl: Kutbeddîn İsmail, Mehmed Efendi el-kâtib, Halil Bey b. Eyüb, es-Seyyid Hasan b. es-Seyyid Ali, Süleyman b. Nasûh, Receb Çelebi b. Ömer, Ali b. Hasan, Mehmed b. Ali, Ahmed b. Hasan, Mehmed b. Ömer, Hasan b. Veli, Derviş b. Hüseyin, Mahmud b. Sefer, İlyas b. ( ) ve gayruhüm mine’l-hâzırîn.