Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 719 Hüküm no: 790 Orijinal metin no: [121b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Annesinin tasarrufunda olan havass-ı hümayuna ait tarla varise intikal etmeyeceğinden Ayasna bt. Sultana’nın Mahmud Çelebi b. Mustafa aleyhine açtığı davada haksız olduğu Mahmiye-i Edirne’de Ayakana? mahallesinde sâkine iken bundan akdem hâlike olan Sultana nâm Nasrâniye’nin sadriye sagīre kızı Ayasna’nın kıbel-i şer‘den mansûbe vasîsi olan Yagobina bt. Kiro nâm Nasrâniye meclis-i şer‘de havâss-ı hümâyûn arâzisinden olup zikri âtî tarlaya mutasarrıf olan Mahmud Çelebi b. Mustafa muvâcehesinde bi’l-vesâye üzerine da‘vâ ve takrîr-i kelâm edip arâzi-i merkūmeden olup Ada nâhiyesine tâbi‘ bir tarafdan Yusuf Çelebi tarlası ve bir tarafdan Yorgi tarlası ve bir tarafdan Nehr-i Pota ve bir tarafdan tarîk-ı âm ile mahdûd tahmînen yirmi beş dönüm tarla hâlike-i mezbûrenin taht-ı tasarrufunda olup ba‘de helâkihâ zikrolunan tarlaya tapu ile kızı sagīre-i merkūme ehak iken mezbûr Mahmud Çelebi’ye zikri mürûr eden tarlaları sâhib-i arz olan İbrahim Ağa tapu ile tasarrufunu tefvîz etmişdir dedikde hâlike-i merkūmenin mahlûl olan tarlası için kızı sagīre-i mezbûreye hakk-ı tapu olmamağın vasîsi olan merkūme Yagobina bî-vech ta‘arruzdan men‘ olunup mâ-vaka‘a bi’t-taleb sebt olundu. Fi’l-[yevmi’s]-sâbi‘ aşer min-Zilka‘deti’ş-şerîfe li-sene semân ve sittîn ve elf. Şühûdü’l-hâl: Abdülkerim Efendi, Mehmed Çelebi, Halil Çelebi, Arslan Çelebi.