Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 720 Hüküm no: 791 Orijinal metin no: [121b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Koçzâde Hüseyin Ağa’nın sattığı iki yüz elli kantar demir bedelinden Seydi Ali Çelebi’de yüz elli bin iki yüz elli akçe alacağı olduğu Kasaba-i Rodoscuk mahallâtından Akçeşme mahallesinde sâkin olup Dergâh-ı âlî müteferrikalarından olan işbu sâhibü’l-kitâb Koçzâde demekle ma‘rûf Hüseyin Ağa nâm kimesne dîvân-ı sultânîde ma‘kūd meclis-i şer‘de kasaba-i mezbûrede sâbıkā gümrük emîni olan Seydi Ali Çelebi b. ( ) nâm kimesne mahzarında üzerine da‘vâ ve takrîr-i kelâm edip mezbûr Seydi Ali Çelebi’ye beher kantarı dörder yüz yirmi beşer akçeye olmak üzere cem‘an yüz elli bin iki yüz elli akçeye Rûmî kantâr ile iki yüz elli kantardır [demir] bey‘ ve teslîm edip ol dahi vech-i muharrer üzere iştirâ ve kabz ve semen-i mezkûrun zimmetinde bana deyni olduğunu nâtık hat ve hatemini müştemil yedime temessük dahi vermişdir suâl olunup ihkāk-ı hak olunmak matlûbumdur dedikde gıbbe’s-suâl mezbûr Seydi Ali Çelebi cevâbında fi’l-vâki‘ müdde‘î-i mezbûra hat ve hatemimi müştemil def‘ eylediğim deyn temessükü mûcebince yedinden müşterâ ve makbûz beher kantarı dörder yüz yirmi beşer akçeye olmak üzere Rûmî kantâr ile iki yüz elli kantâr demir semeninden cem‘an yüz elli bin iki yüz elli akçe zimmetimde lâzimü’l-edâ deynimdir deyu ikrâr edicek ikrârı mûcebince meblağ-ı mezbûrun edâsına tenbîh birle mâ-vaka‘a [bi’t-taleb ketb olundu.] Fi’l-yevmi’s-sâlis ve’l-ışrîn min-Zilka‘deti’ş-şerîfe [li]-sene 1068. Şühûdü’l-hâl: Mehmed Efendi, Mustafa Efendi el-Kādî bi-Bab, Mehmed Çelebi [b.] Mehmed, Mehmed Çelebi [b.] Abdi, el-Hâc Şa‘ban.