Bab Mahkemesi 54 Numaralı Sicil (H. 1102 / M. 1691) cilt: 20, sayfa: 306 Hüküm no: 366 Orijinal metin no: [62b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Haffâf Şemseddin Vakfı’na ait kazancı dükkânın yeni ihdas edilip komşu binaya zarar verdiği Husûs-ı âti’l-beyânın mahallinde keşf ve tahrîri için sâdır olan fermân-ı âlîye imtisâlen savb-ı şer‘-i münîrden irsâl olunan es-Seyyid Abdülmu‘tî Efendi [ve] hâssa mi‘mârlardan Mehmed Halîfe b. Abdullah ve Mustafa Halîfe b. Mehmed ile mahmiye-i İstanbul’da Ayazmakapısı dâhilinde Hoca Hayreddin mahallesinde vâki‘ Haffâf Şemseddin Vakfı’ndan olan zikri câ’î dükkâna varıp, vakf-ı mezbûrun kāimmakām-ı mütevellîsi olan İbrahim Bey b. Mehmed Paşa hâzır iken zeyl-i kitâbda muharrerü’l-esâmi udûl-i müslimîn huzûrlarında akd-i meclis-i şer‘-i nebevî eyledikde, dükkân-ı mezkûra mülâsık vakf-ı mezbûrdan olan menzilin mutasarrıfesi olan Fâtıma bt. Abdi nâm hâtun meclis-i ma‘kūd-ı mezkûrda, dükkân-ı mezkûrun nısfına icâreteyn-i ma‘hûdeyn ile ve nısf-ı âhar[a] yine kirâ ile mutasarrıf olan Kazgancı Şaban b. Nasuh mahzarında takrîr-i kelâm edip, işbu bir tarafdan zeytinci dükkânı ve bir tarafdan çakıcı dükkânı ve bir tarafdan benim tasarrufumda olan işbu vakıf menzil ve bir tarafdan tarîk-i âm ile mahdûd olan işbu vakıf dükkân mukaddemâ nısfı çakıcı dükkânı ve nısfı destereci dükkânı olup, kadîmden kazgancı dükkânı olmayıp, ba‘dehû mezbûr Şaban iki dükkânı bir edip, hâlâ dükkân-ı mezbûrda büyük ocak ve örs ile kazgancılık işlemek murâd etmekle, darbından menzilimin binâsına vehn isâbet etmek mukarrer olmağın, hâlâ ba‘de’n-nazar ve’s-suâl hakīkat-i hâl tahrîr olunmak matlûbumdur dedikde, gıbbe’l-keşf ve’l-mu‘âyene dükkân-ı mezkûr kadîmden kazgancı dükkânı olmayıp, vech-i meşrûh üzre nısfı çakıcı ve nısf-ı âharı destereci dükkânı olduğunu mezbûr Şaban mu‘terif ve Müslimûn-ı mezkûrûn ihbâr ettiklerinden sonra mezkûrun binâsına vehn isâbet etmek mukarrerdir deyu mezbûr Şaban’ın muvâcehesinde alâ tarîki’ş-şehâde haber verdiklerini mevlânâ-yı mezkûr mahallinde ketb ve tahrîr, ba‘dehû ma‘an ba‘s olunan Abdullah b. Mehmed ve Mahmud b. Mehmed ile meclis-i şer‘a gelip alâ vukū‘ihî inhâ ve takrîr etmeğin, mâ vaka‘a bi’t-taleb ketb olundu. Fi’l-yevmi’s-sâdis aşer min Cumâdelâhire sene 1102. Şuhûdü’l-hâl: Mehmed Efendi b. Mehmed el-imâm, Süleyman Çavuş b. İsmail el-mübâşir, Mehmed b. Mahmud, Osman Ağa b. Ahmed, Mahmud b. Ahmed, İbrahim Bey b. Mahmud, Şaban b. Ahmed, el-Hâc Halil Ağa b. Abdi, es-Seyyid Mustafa Efendi b. Ahmed, Mustafa Çelebi, es-Seyyid Ali Çelebi b. Hasan.