Bab Mahkemesi 54 Numaralı Sicil (H. 1102 / M. 1691) cilt: 20, sayfa: 307 Hüküm no: 367 Orijinal metin no: [62b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Ağa b. İskender’in borcuna karşılık arazisini Kerime bt. Hasan’a devretmesi Husûs-ı âti’l-beyânın mahallinde ketb ve tahrîri için savb-ı şer‘-i enverden me’zûnen irsâl olunan İmâmzâde Mehmed Efendi mahmiye-i İstanbul’da Koska fırını kurbunda Kul Kethüdâsı merhûm Mehmed Ağa menzili demekle ma‘rûf olan menzile varıp, zeyl-i kitâbda muharrerü’l-esâmi müslimîn huzûrlarında akd-i meclis-i kavîm ettikde, sâbıkan Leh üzerine me’mûr olan Ordu-yı hümâyûn kasabbaşısı olan umdetü’l-eşbâh ve’l-imtisâl Mehmed Ağa b. İskender meclis-i ma‘kūd-ı mezbûrda, zevcesi olup hâlâ mahrûse-i Edirne’de Çakır Ağa mahallesinde sâkine bâ‘isetü hâzihi’l-vesîka Kerime bt. Hasan nâm hâtun tarafından husûs-ı âti’l-beyâna vekîl olup, zât-ı mezbûreyi ma‘rifet-i şer‘iyye ile ârifân olan Osman Beşe b. Osman ve Hasan Yazıcı b. Musli el-Edirnevî şehâdetleriyle şer‘an vekâleti sâbite olan birâderi Ali Ağa mahzarında ikrâr-ı tâm ve takrîr-i kelâm edip, müvekkile-i mezbûre Kerime’nin benim zimmetimde cihet-i şer‘îden yedi bin altı yüz elli guruş hakkı olduğunu mezbûr Ali Ağa bi’l-vekâle da‘vâ ve ben inkâr edip ve vekîl-i mezbûr müdde‘âsını ısbât etmeyip şer‘an bana yemîn teklîf olundukda ben nükûl etmekle, meblağ-ı mezbûru edâ ve teslîme hükm-i şer‘î lâhık olmuşdu. El-hâletü hâzihî akd-i âtî sudûruna değin silk-i mülkümde münselik olup, mahmiye-i mezbûrede Kızıltaş mahallesinde vâki‘ cenûben tarîk-i âm ve şarkan ba‘zan Davud Bey Vakfı olup mukāta‘a ile tasarrufumda olan arsa ve ba‘zan Ferhad Bey ve Kamer Hâtun vakıfları olup kezâlik mukāta‘a ile tasarrufumda olan arsa ve ba‘zan kezâlik Medîne-i münevvere Vakfı’ndan tasarrufumda olan hadîka ve şimâlen yine Medîne-i münevvere Vakfı olup icâre ile tasarrufumda olan hadîka ve garben Nalband kızı ve ba‘zan sâbıkan Kapı Ağası Kâtibi Ebûbekir Efendi menzilleri ile mahdûd hâriciyesinin tabaka-i ulyâsında üç bâb oda ve bir mâbeyn odası ve bir hazîne odası ve bir sofa ve bir kiler ve bir dehliz ve iki kenîf ve tabaka-i vustâsında dört bâb oda ve dehliz ve kenîf ve süflâsında zikr olunan Davud Bey Vakfı’ndan olan arsa üzerine mebnî bir bâb sagīr oda ve bir anbar ve bir ahır ve matbah ve iki bi’r-i mâ ve dâhiliyesi iki halvetli bir hamam ve bir mikdâr hadîka ve havluyu ve dört fevkānî oda ve bir sofa ve dehliz ve kenîf ve tahta-pûş ve tahtânî iki bâb oda ve bir matbah [63a] ve bir su kuyusunu müştemil mülk menzilimi, beş bin esedî guruşa ve yine Edirne nevâhîsinden Hasköy nâhiyesinde Silioğlu? nâm karyede vâki‘ Çil Ahmed Paşa çiftliği demekle meşhûr ve bana intimâ ile tahdîd ve tavsîfden müstağnî büyût-ı adîdeyi ve bağı müştemil mülk çiftliğimi, iki göz değirmen ve içinde mevcûd elli re’s sığır ve inek ve bin re’s koyun ve sâir cemî‘-i tevâbi‘ ve levâhıkı ve kâffe-i hukūk ve merâfıkı ile bi safkatin vâhidetin iki bin guruşa mezbûr Ali Ağa’ya bey‘ ve temlîk, ol dahi müvekkilesi mezbûre Kerime Hâtun için bi’l-vekâle iştirâ ve kabûl ve temellük edip ve yine mârru’z-zikr çiftlik ile ma‘an taht-ı tasarrufumda olan lede’l-ahâlî ve’l-cîrân ma‘lûmü’l-hudûd iki kışla ve koru ve sâir ma‘lûmü’l-mikdâr tarlalarımı dahi bâ-ma‘rifet-i sâhib-i arz yüz elli guruş bedel mukābelesinde ferâğ ve tefvîz, ol dahi kezâlik mezbûre için tefevvüz ve kabûl edip ve yine evvelâ zikr olunan menzil-i kebîre mülâsık olup zikr olunan Davud Bey ve Ferhad Bey ve Kamer Hâtun vakıflarına senede altı yüz altmış akçe mukāta‘a ile taht-ı tasarrufumda olan ma‘lûmü’l-hudûd ve’l-mikdâr arâzîyi ve yine ba‘zan menzil-i mezbûrun cânib-i şimâlîsinde ve ba‘zan şarkīsinde vâki‘ Medîne-i münevvere -sallallâhu alâ münevverihâ- vakfından senede yedi yüz yirmi akçe ücret-i müeccele ile kezâlik yedimde ve taht-ı tasarrufumda olup bir köşk ve üç su kuyusu ve eşcâr-ı müsmire ve gayr-ı müsmireyi müştemil bi hesâb-i terbî‘î iki bin dokuz yüz yetmiş iki zirâ‘ hadîkayı yine mezbûr Ali Ağa’ya, mütevellîleri izni ve ma‘rifetleriyle beş yüz guruş bedel mukābelesinde ferâğ ve tefvîz, ol dahi tefevvüz ve kabûl ve kabz eyledikden sonra semen-i mezbûr ile bedel-i mezkûr min haysü’l-mecmû‘ yedi bin altı yüz elli guruş deyn-i mezbûra takās, ol dahi mukāssa ve kabûl eyledikden sonra çiftlik-i mezbûr ve sâir emlâk-i mezkûreyi mahallinde kabz ve tasarrufa merkūme Kerime Hâtun’u taslît eyledim. Ba‘de’l-yevm mârru’z-zikr menzil ve çiftlik ve içinde hayvânât ve değirmen merkūme Kerime’nin mülk-i müşterâsı ve arâzî-i mezkûre ve menzil-i mezkûr kurbunda olan bahçe ve arsa-i merkūme hakk-ı müfevvazıdır, keyfe mâ yeşâ mutasarrıfa olsun dedikde, gıbbe’t-tasdîki’ş-şer‘î vâki‘ hâli mezbûr Mehmed Efendi mahallinde ketb ve tahrîr edip, ba‘dehû cânib-i şer‘den ma‘an irsâl olunan İbrahim Çelebi b. Ahmed ve Mustafa Beşe ile meclis-i şer‘a gelip alâ vukū‘ihî inhâ ve takrîr etmeğin, işbu bi’t-taleb ketb olundu. Fî evâsıtı min Cumâdelâhire li sene isneteyn ve mi’e ve elf. Şuhûdü’l-hâl: Yusuf b. Abdullah, Hasan tâbi‘-i Abdurrahman Efendi, Mehmed b. el-Hâc Ali, Hasan Yazıcı b. Musli, el-Hâc Mustafa b. Abdullah, el-Hâc Mehmed b. Abdullah, Mehmed Efendi b. Fazlullah, Abdurrahman Efendi b. Mehmed.