Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 721 Hüküm no: 793 Orijinal metin no: [122a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yani’nin çocukları Nikola ve Arakir’in Ali Bey b. Murad tarafından alınan malları konusunda sulh olunduğu Burgos kazâsına tâbi‘ Çiftlik nâm karye ahâlîsinden Nikola ve Arakir veledey Yani nâm zimmîler meclis-i şer‘de bi’l-fi‘il Çatalca’da hadîka-i sultânî ustası olan Ali Bey b. Murad tarafından sulh ve ibrâya sâbitü’l-vekâle vekîl olan Ahmed b. Musa mahzarında her biri ikrâr ve takrîr-i kelâm edip merkūm Ali Bey’in isimleri ma‘lûmum olmayan âdemleri karye-i merkūmelerinde ikisi doru ve bir kır ve biri siyah dört re’s mülk kısrak ile iki eğer ve iki beyaz kaput ve iki yünlü eyer heğbe ve iki bukağı ve bin kırk beş akçemizi zulmen ahz u kabz ve bizi ahz [ü] bend ile getirip merkūm Ali Bey’e teslîm eylediklerinde mezbûr Ali Bey dahi zikri sebk eden dört re’s kısrak ile meblağ-ı merkūm ve eşyâ-i mezkûreyi ahz u kabz eylemişidi hâlâ müvekkil-i merkūm Ali Bey ahz eylediği aynî ile ikisi doru ve biri kır ve siyah kısrağımız yedlerinde telef olmağla ol mukābilede dahi bir re’s doru kısrak ile meblağ-ı mezbûru ve eşyâ-i merkūmeyi mezbûr Ahmed’in yedinden bi’t-tamâm ahz u kabz edip ba‘de’l-yevm husûs-ı merkūma müte‘allik da‘vâdan müvekkil-i merkūm Ali Bey’in zimmetini ibrâ-i âm ile ibrâ ve ıskāt etdik dediklerinde gıbbe’t-tasdîkı’ş-şer‘î mâ-vaka‘a bi’t-taleb sebt olundu. Fi’s-sâlis ve’l-ışrîn min-Zilka‘deti’ş-şerîfe li-sene semân ve sittîn ve elf. Şühûdü’l-hâl: Abdülkerim Efendi, Ahmed b. Mehmed, Halil Çelebi [b.] Eyüb.