Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 722 Hüküm no: 795 Orijinal metin no: [122b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim b. Abdülkerim’in tereyağı bedelinden alacağı olduğu iddiasıyla Osman Bey b. Abdullah aleyhine açtığı davada iddiasını ispat edemediği Medîne-i Belgrad sükkânından İbrahim b. Abdülkerim meclis-i şer‘de işbu bâ‘isü’l-kitâb Osman Bey b. Abdullah mahzarında üzerine da‘vâ ve takrîr-i kelâm edip merkūm Osman Bey’e mahmiye-i İstanbul’da beher vakıyyesi otuz ikişer akçeye olmak üzere cem‘an dokuz bin beş yüz seksen dört akçeye iki yüz doksan dokuz buçuk vakıyye revgan-ı sâde bey‘ ve teslîm ol dahi iştirâ ve kabûl ve kabz eyledikden sonra semeni olan meblağ-ı mezbûru merkūm Osman Bey’den taleb eylediğimde edâ ve teslîmden imtinâ‘ eder suâl olunup alıverilmek matlûbumdur dedikde gıbbe’s-suâl ve’l-inkâr müdde‘î-i merkūm İbrahim’den sıdk-ı makālini mübeyyine beyyine taleb olundukda ityân-ı beyyineden izhâr-ı acz edip istihlâf olundukda vech-i muharrer üzere müdde‘î-i mezbûrdan her vakıyyesi otuz ikişer akçeye olmak üzere cem‘an dokuz bin beş yüz seksen dört akçeye iki yüz doksan dokuz buçuk vakıyye revgan-ı sâde iştirâ ve kabz etmediğine yemîn billâhi’l-aliyyi’l-azîm etmeğin mûcebince bî-vech mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min-Zilka‘deti’ş-şerîfe sene 1068. Şühûdü’l-hâl: Mehmed Efendi el-kādî, Mehmed Çelebi b. Ahmed, Halil Çelebi b. Eyüb, Arslan Beşe, İsa Bey b. Ahmed ve gayruhüm mine’l-hâzırîn.