Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 729 Hüküm no: 805 Orijinal metin no: [124b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Mehmed’in Ataullah Vakfı’na bin beş yüz akçe borcu olduğu Mahmiye-i Edirne’de Atâullah Vakfı’na bi’l-fi‘il mütevellî olan Yusuf Efendi b. Abdullah nâm kimesne mahmiye-i merkūmede meclis-i şer‘de Âişe bt. Mehmed nâm hâtun mahzarında üzerine da‘vâ ve takrîr-i kelâm edip mezbûre Âişe zimmetinde mâl-ı vakf-ı mezbûrdan bin beş yüz akçe olup hâlâ vermede te‘allül eder suâl olunup vakıf için alıverilmek matlûbumdur dedikde gıbbe’s-suâl mezbûre cevâbında mâl-ı vakf-ı mezbûrdan ancak sekiz yüz akçe istidâne ve kabz eyledim deyip ziyâde yedi yüz akçe deyni olduğunu inkâr edicek mütevellî-i mezbûrdan müdde‘âsını mübeyyine beyyine taleb olundukda udûl-i ricâlden Musa b. Abdullah ve Yusuf b. Abdullah nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ mezbûre Âişe bizim huzûrumuzda mâl-ı vakf-ı mezbûrdan mütevellî-i mezkûr Yusuf Efendi yedinden bin beş yüz akçe istidâne ve kabz eyledi biz bu husûsa bu vech üzere şâhidleriz şehâdet dahi ederiz deye herbiri edâ-i şehâdet-i şer‘iyye ettiklerinde gıbbe ri‘âyeti şerâiti’l-kabûl şehâdetleri makbûle olmağın mûcibiyle ba‘de’l-hükm mâ-vaka‘a bi’t-taleb sebt olundu. Fî gurreti Zilhicceti’ş-şerîfe li-sene semân ve sittîn ve elf. Şühûdü’l-hâl: Mehmed Çelebi b. ( ), Arslan Beşe, Bayram Beşe, İsa Bey b. ( ), Ca‘fer Bey ve gayruhüm.