Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 729 Hüküm no: 806 Orijinal metin no: [124b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil b. Himmet’in Sabuncu Kasım Vakfı’na ait arsa üzerine yaptığı binaların yıkılarak arsayı vakfa teslimine karar verildiği Mahmiye-i Edirne’de merhûm Sabuncu Kasım Vakfı’nın evlâd-ı vâkıfdan olup meşrûtiyet üzere bi’l-fi‘il mütevelliyesi olan râfi‘atü’l-kitâb Fâtıma bt. Kasım nâm hâtun mahmiye-i mezbûrede meclis-i şer‘de Halil b. Himmet nâm kimesne mahzarında üzerine da‘vâ ve takrîr-i kelâm edip babam merhûm-ı mezbûr Sabuncu Kasım Vakfı’nın tevliyeti ve vakfeylediği menzil-i âti’l-beyânının süknâsı evlâd-ı evlâdına ve evlâd-ı evlâd-ı evlâdına şart ve ta‘yîn eylediğini bin beş senesi ile müverrah olan mümzâ ve mahtûme vakfiye-i ma‘mûlün-bihâda mastûr olduğu üzere ber-mûceb-i şart-ı vâkıf sâkine olduğum mahmiye-i merkūmede Kürd Hoca mahallesinde vâki‘ bir tarafdan el-Hâc Murad mülkü ve bir tarafdan Sitti Hâtun mülkü ve bir tarafdan Âişe Hâtun mülkü ve bir tarafan tarîk-ı âm ile mahdûd olan vakıf menzil arsasından tûlen ve arzan be-hesâb-ı şatrancî altı zirâ‘ arsamı mezbûr Halil gasb ve üzerine bir oda binâ ve ihdâs eylemişdir hâlâ suâl olunup ihdâs eylediği binânın kal‘ı vakfa muzır olmamağın binâyı kal‘ ve ref‘ ve arsayı bana teslîme tenbîh olunmak matlûbumdur dedikde gıbbe’s-suâl mezbûr Halil cevâbında zikrolunan arsa üzerine bir oda binâ ve ihdâs eylediğini ikrâr ve arsa-i mezkûre zikri mürûr eden vakıf menzil arsasından olduğunu inkâr edicek mütevellîye-i merkūme Fâtıma’dan müdde‘âsını mübeyyine beyyine taleb olundukda udûl-i ricâlden olup Kürd Hoca mahallesinde sâkin Mustafa b. Musa ve Arzuman b. Arslan nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ mezbûr Halil Çelebi hâlâ üzerine bir oda binâ ve ihdâs eylediği tûlen ve arzan be-hesâb-ı şatrancî altı zirâ‘ arsa merhûm-ı mezbûr Sabuncu Kasım Vakfı olup mütevellîye-i merkūme sâkine olduğu vakıf menzil arsasıdır mezbûr Halil gasb ve üzerine bir oda binâ ve ihdâs eyledi biz bu husûsa bu vech üzere şâhidleriz şehâdet dahi ederiz deyu herbiri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiye şehâdetleri makbûle olmağın şehâdet-i merkūme mûcebince binânın kal‘ı vakfa muzır olmamağın binâyı ref‘ ve arsa-i mezbûreyi mütevelliye-i mezbûreye teslîme mezbûr Halil’e tenbîh olunup mâ-vaka‘a bi’t-taleb ketb olundu. Fî gurreti Zilhicceti’ş-şerîfe li-sene semân ve sittîn ve elf. Şühûdü’l-hâl: Mehmed Efendi, Bayram Bey, Arslan Bey, Ca‘fer Bey, İsa Bey ve gayruhüm.