Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 730 Hüküm no: 807 Orijinal metin no: [125a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Safiye bt. Kalender’in mehir ve eşya hususunda boşandığı kocası Ali b. Mehmed’in zimmetini ibra ettiği Mahmiye-i Edirne’de İsmail Ağa mahallesinde sâkine olan Safiye bt. Kalender nâm hâtun meclis-i şer‘de zevc-i mutallıkı olan Ali b. Mehmed nâm kimesne mahzarında ikrâr ve takrîr-i kelâm edip mezbûr Ali beni tezevvüc etdikde iki bin akçe kıymetli civan-kaşı bir sîm kemer kuşak ve bin akçe kıymetli bir kırmızı atlas kaftan bana mehr-i mu‘accel verip ben dahi ahz u kabz edip beni tatlîk eylediği hînde tekrâr eşyâ-i mezbûreyi ahz etmekle zimmetinde kalmışidi ben dahi da‘vâ ve taleb eyledikde ol dahi inkâr etmekle hâkimü’ş-şer‘ huzûrunda beyyine-i âdile ile isbât ve hükm-i şer‘î lâhık oldukdan sonra eşyâ-i merkūme yedinde telef olmağla mukābilesinde bin akçe kıymetli bir neftî zenne ferâce ve bin akçe kıymetli bir neftî merdâne ferâce ve sekiz yüz nakid akçe verip ben dahi eşyâ-i merkūme ve meblağ-ı mezbûru merkūm Ali Çelebi yedinden ahz u kabz edip ba‘de’l-yevm husûs-ı mezbûra müte‘allik da‘vâ ve nizâ‘ım yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâbi‘aşer min-Zilka‘deti’ş-şerîfe li-sene semân ve sittîn ve elf. Şühûdü’l-hâl: Mehmed Efendi el-kādî, Halil Çelebi b. Eyüb, Bayram Beşe, Arslan Beşe.