Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 731 Hüküm no: 808 Orijinal metin no: [125a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin b. Mustafa’nın Hasan Paşa’dan satın aldığı menzilini şüfa hakkı olduğunu ispat eden Ümmühani bt. Süleyman’a bedeli karşılığında devrettiği Mahmiye-i Edirne’de Firuz mahallesinde sâkin Hüseyin b. Mustafa nâm kimesne meclis-i şer‘-i hatîr-i lâzimü’t-tevkīrde mahalle-i merkūmede sâkin işbu bâ‘isü’l-kitâb Ümmühani bt. Süleyman nâm hâtun mahzarında ikrâr ve takrîr-i kelâm edip zikrolunan mahallede vâki‘ bir tarafdan merkūme Ümmühani mülkü ve bir tarafdan Pîlhâne virâneliği ve tarafeynden tarîk-ı âm ile mahdûd bir fevkānî ve iki tahtânî odayı ve sofayı ve su kuyusunu ve eşcâr-ı müsmire ve gayr-ı müsmireyi müştemil cemî‘ menzil bundan akdem Hasan Paşa nâm kimesnenin yedinde mülkü ve hakkı olduğu hâlde merkūm Hasan Paşa cemî‘ menzil-i merkūmu kâffe-i hukūk ve merâfıkı ile on beş bin dört yüz fıddî râyic [fi’l]-vakt akçeye bana bey‘-i bâtt-ı sahîh ile bey‘ ve teslîm edip ben dahi nefsim için iştirâ ve tesellüm ve kabz eylediğimden sonra mezbûre Ümmühani menzil-i merkūm hâlâ yedimde olan mülk menzile muttasıl olmağla hakk-ı şüf‘a benimdir deyu üzerime da‘vâ-yı muvâsebe ve istihkāk edip iştirâmı istimâ‘ı hîninde da‘vâ-yı muvâsebe için işhâdı ve inde’l-men‘ li-ecli’l-istihkāk işhâdını ve da‘vâ-yı şüf‘asında şerâit-i şüf‘ayı mevâkı‘-ı (muvakkı‘-ı) kitâb tûbâ lehü ve hüsnü-meâb huzûrunda beyyine-i âdile ile isbât edip mûmâ-ileyh dahi ba‘de ri‘âyeti şerâiti’l-istimâ‘ ve’l-hükm bi-hükmi’ş-şüf‘a menzil-i merkūmu mezbûre Ümmühani için üzerime hükm-i sahîh-i şer‘î eyledikden sonra bâyi‘-i mezbûra verdiğim on beş bin dört yüz akçe semen ile cemî‘ menzil-i mezbûru merkūme Ümmühani Hâtun’a temlîk ve teslîm edip ol dahi temellük ve tesellüm eyleyip meblağ-ı mezbûr on beş bin dört yüz akçe merkūme Ümmühani’nin yedinden tamâmen ahz u kabz eyledim min ba‘d cemî‘ menzil-i merkūm mezbûrenin mülk-i mahzı ve hakk-ı sırfıdır menzil-i mezbûra ve semen-i merkūma müte‘allik bi-vechin mine’l-vücûh alâka ve medhalim kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’s-sâlis min-Zilhicceti’ş-şerîfe sene 1068. Şühûdü’l-hâl: Mustafa [b.] Mehmed, Ebûbekir b. Kelami, Hasan [b.] Müstecâb, Mehmed [b.] Ahmed, Mehmed [b.] Veli, Yusuf [b.] Abdullah, Arslan Beşe, Bayram Beşe b. ( ), Halil Çelebi [b.] Eyüb.