Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 732 Hüküm no: 810 Orijinal metin no: [125b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Paşazâde Süleyman Bey’in Ahmed Bey b. Cafer’den otuz beş bin beş yüz altmış akçe alacağı olduğu Dergâh-ı âlî dâme mahfûfen bi’l-me‘âlî kapıcıbaşılarından iftihârü’l-emâcid ve’l-ekârim câmi‘u’l-mehâmid ve’l-mekârim Hasan Paşazâde Süleyman Bey nâm kimesne mahmiye-i Edirne’de meclis-i şer‘de Ahmed Bey b. Ca‘fer nâm kimesne mahzarında üzerine da‘vâ ve takrîr-i kelâm edip bin altmış yedi senesine mahsûb olmak üzere Vilâyet-i Anadolu’da kasaba-i Kastamonu’nun damgası hizmeti taraf-ı mîrîden yüz elli bin akçeyi bana deruhde olunup ben dahi iltizâm ve kabûl eylediğimden sonra zikrolunan hizmetin mahsûlünü cem‘a tarafımdan mezbûr Ahmed’i vekîl edip ol dahi vekâleti hasebiyle sene-i mezbûreye mahsûb olmak üzere zikrolunan damga hizmetinin mahsûlünden yüz elli bin akçe cem‘ ve tahsîl ve ahz u kabz etmeğin hâlâ meblağ-ı mezbûr yüz elli bin [akçenin] yedinden yüz on dört bin dört yüz kırk akçesini ahz u kabz edip bâkī zimmetinde otuz beş bin beş yüz altmış akçem kalmağla taleb ederim suâl olunup alıverilmek matlûbumdur dedikde gıbbe’s-suâl mezbûr Ahmed Bey cevâbında fi’l-vâki‘ vech-i muharrer üzere zikrolunan damga hizmeti taraf-ı mîrîden yüz elli bin akçeye müşârun-ileyh Süleyman Bey’e deruhde olunup ol dahi iltizâm ve kabûl eyledikden sonra zikri mürûr eden damga hizmetinin mahsûlünü cem‘a tarafından beni tevkîl edip ben dahi vekâletim hasebiyle sene-i mezbûreye mahsûb olmak üzere mârrü’z-zikr damga hizmetinin mahsûlünden yüz elli bin akçe cem‘ ve tahsîl ve ahz u kabz ve yüz on dört bin dört yüz kırk akçesini yedine def‘ ü teslîm bâkī zimmetimde mûmâ-ileyh Süleyman Bey’e otuz beş bin beş yüz altmış akçe deynim vardır deyu ikrâr edicek ikrârı mûcebince meblağ-ı mezbûrun edâsıyla ilzâm olunup mâ-vaka‘a bi’t-taleb ketb olundu. Fi’s-sânî ve’l-ışrîn min-Zilka‘deti’ş-şerîfe li-sene semân ve sittîn ve elf. Şühûdü’l-hâl: Yusuf Ağa ser-bevvâbân-ı Dergâh-ı âlî, Ahmed Ağa ser-bevvâbân-ı Dergâh-ı âlî, Osman Ağa ser-bevvâbân-ı Dergâh-ı âlî, İsmail Ağa rûznâmçeî-i (…), Mehmed Efendi, Yusuf Çelebi, Eyüb Çelebi ve gayruhüm.