Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 737 Hüküm no: 816 Orijinal metin no: [127a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Bey b. Hasan’ın Kasım b. Ali’den haksız yere aldığı para ve hayvanlarını iade etmesi Depedelen kazâsına tâbi‘ Badra nâm karye sâkinlerinden Kasım b. Ali nâm kimesne meclis-i şer‘de karye-i merkūme za‘îmi olan fahrü’z-zu‘amâ Mehmed Bey b. Hasan mahzarında üzerine da‘vâ ve takrîr-i kelâm edip işbu hâzır bi’l-meclis Mehmed Bey târih-i kitâbdan bir sene mukaddem benim bi-gayri vechin cerîme nâmına yirmi aded riyâlî guruşumu vakt-i ahzda kıymetleri takvîm-i sahîh ile mukavvem kırk guruş kıymetli bir re’s siyah katır ve yine kırk guruş kıymetli bir re’s kır katır ve on guruş kıymetli bir re’s karasığır öküzümü ahz u kabz eylemişdir suâl olunup alıverilmesi matlûbumdur dedikde gıbbe’s-suâl ve akībe’l-inkâr müdde‘î-i merkūmdan müdde‘âsını mübeyyine beyyine taleb olundukda udûl-i ricâlden Hasan Beşe b. Ali ve Ali b. Sinan nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka işbu mârrü’z-zikr Mehmed Bey târih-i kitâbdan bir sene mukaddem müdde‘î-i mezbûr Kasım’dan bizim huzûrumuzda bi-gayri vech-i şer‘î cerîme nâmına yirmi aded riyâlî guruş ve bir re’s siyah katır ve bir re’s kır katır ve bir re’s karasığır öküzünü ahz u kabz eyledi biz bu husûsa bu vech üzere şâhidleriz şehâdet dahi ederiz deyi herbiri edâ-i şehâdet-i şer‘iyye ettiklerinde gıbbe ri‘âyeti şerâiti’l-kabûl şehâdetleri hayyiz-i kabûlde [127b] makbûle oldukdan sonra meblağ-ı merkūm yirmi aded guruş ve zikrolunan iki re’s katır ile bir re’s öküzü aynıları mevcûd ise aynılarını müstehlekeyse vech-i meşrûh üzere kıymetlerini teslîme tenbîh birle mâ-vaka‘a bi’t-taleb ketb olundu. Fi’l-yevmi’l-hâdî ve’l-ışrîn min-Zilhicceti’ş-şerîfe li-sene semân ve sittîn ve elf. Şühûdü’l-hâl: Mehmed Çavuş b. ( ) el-mübâşir, Mustafa Beşe b. Hasan, İsa Bey b. Ahmed, Arslan Beşe b. ( ) saraç, Bayram Beşe çukadâr.