Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 737 Hüküm no: 817 Orijinal metin no: [127b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Neslihan bt. Ali’nin kocası Seyyid Mehmed b. Seyyid Emrullah’tan boşandığı (Muhâla‘a) Çirmen kazâsına tâbi‘ Aktaş nâm karyede sâkine Neslihan bt. Ali nâm hâtun tarafından hul‘ ve ibrâ-i âti’z-zikri ikrâra es-Seyyid Ahmed b. es-Seyyid Veli ve Mehmed b. Abdullah şehâdetleri ile sâbitü’l-vekâle vekîl olan Mustafa b. Hüseyin meclis-i şer‘de müvekkile-i merkūmenin zevc-i mutallıkı işbu bâ‘isü’l-kitâb es-Seyyid Mehmed b. es-Seyyid Emrullah mahzarında bi’l-vekâle ikrâr ve takrîr-i kelâm edip müvekkilem mezbûrenin merkūm es-Seyyid Mehmed zimmetinde mütekarrır olan bin yüz akçe mehr-i müeccelini merkūm es-Seyyid Mehmed yedinden bi’t-tamâm ahz u kabz edip nafaka-i iddet ve meûnet-i süknâsından fâriğa olmak üzere muhâla‘a eyledikde mezbûr es-Seyyid Mehmed dahi vech-i muharrer üzere hul‘-ı mezbûru kabûl eyledikden sonra sâir zevciyyete müte‘allik da‘vâ ve nizâ‘dan merkūm es-Seyyid Mehmed’in zimmetini ibrâ ve ıskāt etdi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-ışrîn min-Zilhicceti’ş-şerîfe li-sene semân ve sittîn ve elf. Şühûdü’l-hâl: İsa Bey, Halil Çelebi [b.] Eyüb, el-Hâc İbrahim b. ( ), es-Seyyid İsmail b. es-Seyyid Hüseyin, es-Seyyid Ali [b.] Hayrullah.