Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 738 Hüküm no: 818 Orijinal metin no: [127b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Çelebi b. Ali’nin Ada nahiyesine bağlı Doğancıbudak köyünden bazı zimmiler aleyhine açtığı alacak davasında sulh olduğu Mahmiye-i Edirne’de Mercimek mahallesi sâkinlerinden İbrahim Çelebi b. Ali nâm kimesne meclis-i şer‘de mahmiye-i mezbûre nevâhîsinden Ada nâhiyesine tâbi‘ Kam Doğancıbudak nâm karye ahâlîsinden ashâbü’l-kitâb Apostoli v. Göne ve Andriya v. İsterati ve Adir v. Yanaki ve Kosta v. Niko ve Aşmi v. Sako ve Karaslı v. Filip ve Mihal v. Mavridi ve İnaş v. Aleski ve Kuzma v. Hıristo ve İsteryo v. Dimitraki ve sâirleri muvâcehelerinde ikrâr ve takrîr-i kelâm edip bundan akdem mezbûrûn zimmîlere alâ tarîkı’l-karz kırk iki bin akçe def‘ u teslîm ve mezbûrûn zimmîler dahi ahz u kabz etmişler idi hâlâ mezbûrûndan meblağ-ı mezbûru taleb ve da‘vâ eylediğimde onlar dahi bi’l-külliyye inkâr etmekle beynimizde münâza‘ât-ı kesîre ve muhâsamât-ı şedîde vâkı‘a olmuşidi el-hâletü hâzihî beynimize muslihûn tavassut edip beni da‘vâ-yı mezkûreden an-inkâr iki yüz keyl buğday üzerine inşâ-i akd-i sulh ettiklerinde ben dahi sulh-ı mezbûru kabûl ve bedel-i sulh olan iki yüz keyl buğdayın yüz keylini târih-i kitâbdan yirmi beş gün tamâmına değin ve yüz keylini dahi üç yüz altmış gün tamâmına değin [128a] edâ ve teslîm etmek üzere te’cîl eyledim ba‘de’l-yevm husûs-ı mezbûra müte‘allik olan cemî‘ de‘âvî ve mutâlebâtdan ve eymân ve muhâsamâtdan mezbûrûn zimmîlerin zimmetlerini ibrâ-i âm ile ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-hâmis min-Zilhicceti’ş-şerîfe li-sene semân ve sittîn ve elf. Şühûdü’l-hâl: Halil Çelebi b. Eyüb, Hüseyin Çelebi b. Mustafa, İsmail b. Hürrem Çelebi, Derviş Bey.