Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 739 Hüküm no: 819 Orijinal metin no: [128a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şeyh Çakmak Dede Vakfı’na ait Cisr-i Ergene kazasındaki mezraya vakıf evladından olan Hadice, Âşir ve Fatma’nın müşterek olarak tasarruf etmeye razı oldukları Cisr-i Ergene kazâsına tâbi‘ Çakmakköyü nâm karyede sâkine Hadice Hâtun meclis-i şer‘de bâ‘iseteyi’l-kitâb Âşir ve Fâtıma nâm kimesneler mahzarlarında ikrâr ve takrîr-i kelâm [edip] kazâ-i mezbûra tâbi‘ Yundoğlanı ve Seferciköyü nâm karyeler kurbünde lede’l-ahâlî ve’l-cîrân ma‘lûmü’l-hudûd olan mezra‘a taraf-ı saltanat-ı aliyyeden vakıf ve zikrolunan mezra‘aya sâlikînden merhûm Şeyh Çakmak Dede mutasarrıf ola ba‘de vefâtihî evlâd-ı evlâd-ı evlâd-ı evlâdı batnen ba‘de batnin ve neslen ba‘de neslin mutasarrıf olalar deyu şart ve ta‘yîn olunduğu sekiz yüzelli senesi ile müverraha olan mümzât vakfiye-i ma‘mûlün-bihâda tasrîh ve tebyîn olunmağla ber-mûceb-i şart-ı vâkıf mezbûr Çakmak Dede evlâdından olduğu hasebiyle zikrolunan mezra‘aya mutasarrıf olup hâlâ mezbûrân Âşir ve Fâtıma zikrolunan Çakmak Dede evlâdından olup ve benimle derecede müsâvî olmağla zikrolunan mezra‘ayı iştirâk-i seviyy üzere mutasarrıf olmağın beynimizde bi’t-terâzî ittifâk eyledik dedikde mezbûrân Âşir ve Fâtıma dahi merkūme Hadice’nin kelimât-ı meşrûhasını tasdîk etmeğin mâ-vaka‘a bi’t-taleb ketb olundu. Fi’l-ışrîn min-Zilhicceti’ş-şerîfe sene 1068. Şühûdü’l-hâl: Ahmed b. Hasan, Mehmed Bâşe, Ahmed b. Veli, Bayram, Arslan.