Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 739 Hüküm no: 820 Orijinal metin no: [128a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Efendi b. Hasan’ın para ve eşyasını alıp vermediği iddiasıyla Şahin Çavuş b. Mehmed Bey aleyhine açtığı davada sulh olduğu Sâbıkā Çorlu kādısı olan Hüseyin Efendi b. Hasan nâm kimesne meclis-i şer‘de Şahin Çavuş b. Mehmed Bey mahzarında ikrâr ve takrîr-i kelâm edip Çorlu kādısı olduğum hâlde üzerime mübâşir olup gelen mezbûr Şahin Çavuş zimmetinde cihet-i karz-ı şer‘îden bin akçe hakkım olduğundan mâ‘adâ otuz riyâlî guruş kıymetli bir re’s eğerli doru bârgir ve iki yüz akçe kıymetli bir kara kılıç ve yüz akçe kıymetli bir kara balta ve yüz elli akçe kıymetli Şamvârî eyer ile teğeltimi bi-gayri vech-i şer‘î ahz u kabz etmekle ben dahi da‘vâ ve taleb eylediğimde ol dahi inkâr etmeğin beynimizde münâza‘ât-ı kesîre ve muhâsamât-ı şedîde vâki‘ olmuşidi el-hâletü hâzihî beynimize Müslimûn-ı muslihûn tavassut edip bin üç yüz akçe kıymetli bir re’s kır bârgir ve iki yüz akçe üzerine inşâ-i akd-i sulh ettiklerinde ben dahi sulh-ı mezbûru kabûl ve bedel-i sulh olan zikri sebk eden kır bârgir ile meblağ-ı mezbûru merkūm Şahin yedinden tamâmen ahz u kabz eyleyip husûs-ı mezbûra müte‘allik olan da‘vâ ve nizâ‘dan mezbûr Şahin’in zimmetini ibrâ-i âmm-ı [128b] kātı‘u’n-nizâ‘la ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’s-sâlis aşer min-Zilka‘deti’ş-şerîfe li-sene semân ve sittîn ve elf. Şühûdü’l-hâl: Hasan Çavuş [b.] Mehmed, Abdurrahman [b.] Mehmed, Mustafa [b.] Sinan, Sefer Çavuş, Hasan Çelebi.