Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 740 Hüküm no: 821 Orijinal metin no: [128b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Todori v. Dimitri’nin terekesi hususunda varislerinden kardeşi Yorgoç’un karısı Aleksandra’nın zimmetini ibra ettiği Medîne-i Edirne’de Papa Kaçyanos (Kaşyanos) mahallesinde sâkin iken hâlik olan Todori v. Dimitri nâm zimmînin verâseti zevce-i metrûkesi Aleksandra nâm Nasrâniye ile li-ebeveyn karındaşı Yorgoç nâm zimmîye münhasıra olup ve tashîh-i mes’elesi dört sehimden olup bir sehmi merkūme Aleksandra’ya ve üç sehmi mezbûr Yorgoç nâm zimmîye isâbet eylediği şer‘an mütebeyyin oldukdan sonra merkūm Yorgoç meclis-i şer‘-i hatîr-i lâzimü’t-tevkīrde hâlik-i merkūmun zevcesi olup mecmû‘-ı muhallefâtına vâzı‘u’l-yed olan bâ‘isetü’s-sifr merkūme Aleksandra mahzarında ikrâr ve takrîr-i kelâm edip tereke-i hâlik-i merkūmdan olup mahalle-i merkūmede lede’l-ahâlî ma‘lûmü’l-hudûd menzilden ve esâs-ı beyt ve elbise ve sâir menkūlâtdan bî-tarîkı’l-irsi’ş-şer‘î inhisâr-ı mezbûr üzere bana isâbet eden hisse-i şer‘iyyemi da‘vâ ve talebe şürû‘ etmişidim el-hâletü hâzihî husûs-ı merkūma müte‘allik da‘vâ ve talebden merkūme Aleksandra’nın zimmetini ibrâ-i âm ile ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’s-sâbi‘ aşer min-Zilhicceti’ş-şerîfe li-sene semân ve sittîn ve elf. Şühûdü’l-hâl: Mehmed b. Ahmed, Mehmed [b.] Ali, Ahmed [b.] Mehmed, Hüseyin, Bayram Beşe.