Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 743 Hüküm no: 827 Orijinal metin no: [129b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Beşe’nin bir kese akçe alacağı olduğu iddiasıyla Tanos v. Yorgo aleyhine açtığı davada iddiasını ispat edemediği Vilâyet-i Rumeli’nde Delvine’de sâkin zümre-i râcilînden Mustafa Beşe b. ( ) nâm kimesne mahmiye-i Edirne’de meclis-i şer‘de kazâ-i mezbûra tâbi‘Çırpan nâm karyede sâkin Tanos v. Yorgo nâm zimmî mahzarında üzerine da‘vâ ve takrîr-i kelâm edip bundan akdem karye-i mezbûrede merkūm Tanos’un odasında müsâfir olduğumda ol odada olan dolabına vaz‘ edip ve kilitleyip hıfz etmek için yedine bi-tarîkı’l-vedî‘a üç kîse akçe def‘ ve teslîm ol dahi ahz u kabz edip ve zikrolunan dolaba vaz‘ eyledikden sonra kilitleyip hıfz üzere iken ben dahi diyâr-ı âhara müteveccih olup zikrolunan üç kîse akçemi taleb eylediğimde iki kîse akçeyi aynıyla bana def‘ ve teslîm edip ve bir kîse akçemi hâlâ vermede te‘allül eder suâl olunup alıverilmek matlûbumdur dedikde gıbbe’s-suâl merkūm Tanos cevâbında fi’l-vâki‘ mezbûr Mustafa Beşe karye-i merkūmede sâkin olduğum menzilime müsâfir olup ve müsâfir olduğu hâlde sâkin olduğu odanın dolabına vaz‘ edip ve kilidleyip hıfz etmek için yedime üç kîse akçe bi-tarîkı’l-vedî‘a def‘ ü teslîm edip ben dahi izniyle ve emriyle zikrolunan dolaba vaz‘ edip ve kilidleyip hıfz üzere iken zikrolunan dolabdan bir kîse akçesi bilâ-ta‘yîn zâyi‘ oldu dedikde mezbûr Tanos emîn olup yemîn ile musaddak olmağın merkūm Tanos[’a] hıfzında te‘addî ve taksîrât etmediğine yemîn teklîf olundukda ol dahi yemîn billâhi’l-lezî enzele’l-İncîle [alâ İsa] a.s. etmeğin bî-vech mu‘ârazadan men‘ birle. Fî Şevvâli’l-mükerrem li-sene semân ve sittîn ve elf. Şühûdü’l-hâl: Mehmed b. Ahmed, Ahmed b. Hasan, Ahmed b. Mehmed, Receb [b.] Hasan.