Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 743 Hüküm no: 828 Orijinal metin no: [129b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdurrahman Ağa b. Ahmed’in Selanik Emini Ahmed Çavuş’taki alacağına kefaletinden dolayı Ali b. Mustafa’dan beş yüz guruş alacağı olduğu Mahmiye-i İstanbul’da Sultân Mehmed mahallesinde sâkin olup hâliyâ medîne-i Edirne’de sâkin işbu bâ‘isü’l-kitâb Abdurrahman Ağa b. Ahmed nâm kimesne meclis-i şer‘de Ali b. Mustafa nâm kimesne mahzarında üzerine da‘vâ ve takrîr-i kelâm edip sâbıkā Selanik emîni olan fahrü’l-akrân Ahmed Çavuş nâm kimesneye beş yüz riyâlî guruş ikrâz ve teslîm ol dahi istikrâz ve kabz eyleyip meblağ-ı mezbûra merkūm Ali emr ve kabûlü hâviye kefâlet-i sahîha-i şer‘iyye ile kefîl olmuşidi hâlâ meblağ-ı merkūmu kefâleti hasebiyle taleb ederim suâl olunsun dedikde gıbbe’s-suâl ve akībe’l-inkâr müdde‘î-i [merkūmdan müdde‘âsını mübeyyine beyyine] taleb [olundukda] udûl-i ahrâr-ı ricâlden Mustafa Çelebi b. Hüseyin ve İbrahim Bey b. Şükrullah nâm kimesneler li-ecli’ş-şehâde meclis-i şer‘a hâzırân olup fi’l-hakīka bizim huzûrumuzda [130a] müdde‘î-i merkūm mezkûr Ahmed Çavuş’a beş yüz riyâlî guruş ikrâz ve teslîm ol dahi istikrâz ve kabz edip meblağ-ı merkūma mezbûr Ali emr [ve] kabûlü hâviye kefâlet-i sahîha-i şer‘iyye ile kefîl olup biz bu husûsa bu vech üzere şâhidleriz şehâdet dahi ederiz deyu herbiri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiye şehâdetleri makbûle oldukdan sonra mûcebince ba‘de’l-hükm mâ-vaka‘a bi’t-taleb sebt olundu. Fi’s-sâmin ve’l-ışrîn min-Zilhicceti’ş-şerîfe sene [1068.] Şühûdü’l-hâl: Selim b. Mehmed, Hüseyin b. Veli, Receb [b.] Derviş, Mehmed Efendi.