Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 744 Hüküm no: 829 Orijinal metin no: [130a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sultana bt. Yanko’nun mülk bağını haksız yere zaptettiği iddiasıyla Kostantin v. Andreya aleyhine açtığı davada haksız olduğu Edirne’de Papa Kaş[ya]nos mahallesi sâkinlerinden olup bundan akdem hâlik olan Yanko v. Viko nâm zimmînin sulbiye kebîre kızı Sultana nâm Nasrâniye meclis-i şer‘ de bundan akdem hâlik olan Yanaki v. Andreya nâm zimmînin verâseti sulbiye sagīre kızı İstaro ile li-ebeveyn karındaşı Kostantin nâm zimmîye ve zevce-i metrûkesi İsatine nâm Nasrâniye’ye münhasıra oldukdan sonra hâlâ mezbûr Kostantin muvâcehesinde üzerine da‘vâ ve takrîr-i kelâm edip mahmiye-i mezbûre zeylinde Hıdırlık kurbünde Yoncapınarı nâm mahalde vâki‘ bir tarafdan Durmuş bağı ve bir tarafdan Toma bağı ve bir tarafdan Kürkçü Yani bağı ile mahdûd ve bir tarafdan tarîk-ı âm ile mahdûd sekiz dönüm bağ babam hâlik-i mezbûrun mülkü olup ba‘de helâkihî irsen bana intikāl etmeğin hâlâ hâlik-i mezbûr Yanaki’nin veresesi bî-vech vaz‘-ı yed eder suâl olunup kasr-ı yedine tenbîh olunmak taleb ederim dedikde gıbbe’s-suâl mezbûr Kostantin cevâbında zikrolunan bağ müdde‘iye-i mezbûre Sultana’nın babası hâlik-i merkūm Yanko’nun mülkü olup ba‘de helâkihî sulbiye kızı müdde‘iye-i mezbûre Sultana’ya intikāl ettikden sonra mezbûre Sultana dahi bağ-ı mezbûru mûrisimiz hâlik-i mezbûr Yanaki’ye üç bin akçeye târih-i kitâbdan altı sene mukaddem bey‘-i kat‘î ile bey‘ ve teslîm ol dahi iştirâ ve tesellüm eyledikden sonra semeni olan meblağ-ı mezbûru mûrisimiz hâlik-i mezbûr Yanaki yedinden bi’t-tamâm ahz u kabz eyleyip mülk-i müşterâsı olmağla mezbûr Yanaki hâlik oldukdan sonra veresesine intikāl eyledikden sonra mezbûre Sultana zikrolunan bağı mahmiye-i mezbûrede Bâb Mahkemesi’nde nâibü’ş-şer‘i’ş-şerîf huzûrunda üzerime da‘vâ eylediğinde ben dahi verâsetim hasebiyle zikrolunan bağı mezbûre Sultana târih-i kitâbdan altı sene mukaddem mûrisimiz hâlik-i mezbûr Yanaki’ye üç bin akçeye bey‘-i kat‘î ile bey‘ ve teslîm ol dahi iştirâ ve tesellüm eyledikden sonra hâlik-i mezbûr Yanaki yedinden semen-i mezbûru bi’t-tamâm ahz u kabz eyledi deyu mezbûr Sultana muvâcehesinde şühûd-ı udûl ile isbât eyledikden sonra mezbûre Sultana zikrolunan bağ da‘vâsından men‘ olunduğunu hâvî olup zikrolunan Bâb Mahkemesi’nde nâib olan Mahmud Efendi imzâsıyla mümzâ ve hatemiyle mahtûme hüccet-i şer‘iyye ve bin altmış sekiz Zilhiccesi’nin on ikinci günü tarihiyle müverrah hüccet-i şer‘iyye ibrâz edip bi’l-müvâcehe feth u kırâat olunup mezbûre Sultana istintâk olundukda mazmûn-ı hüccet-i mezkûru ikrâr ve i‘tirâf etmeğin mezbûre Sultana bî-vech mu‘ârazadan men‘ birle mâ-vaka‘a bi’t-taleb ketb olundu. Fi’t-tâsi‘ ve’l-ışrîn min-Zilhicceti’ş-şerîfe li-sene semân ve sittîn ve elf. Şühûdü’l-hâl: Ahmed b. Hasan, Memi b. Veli, Mehmed b. Ali, Mehmed b. Hüseyin, Bayram Beşe.