Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 745 Hüküm no: 830 Orijinal metin no: [130a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice bt. Mehmed’in mehir ve eşya hususunda boşandığı kocası Hüseyin b. Mehmed ile sulh olup zimmetini ibra ettiği Edirne’de Karabulut mahallesinde sâkine Hadice bt. Mehmed nâm hâtun meclis-i şer‘de zevc-i mutallıkı Hüseyin b. Mehmed mahzarında ikrâr-ı tâm edip mezbûr zevcim olup beni tatlîk etmeğin ma‘kūdün-aleyh olan dört bin akçe mehr-i müeccelim zimmetinde kaldığından mâ‘adâ bi-gayri vech-i şer‘î bin beş yüz akçe kıymetli kızılcık bir çuka ferâcemi ve bir re’s karasığır danamı ahz u kabz eylemişidi hâlâ zimmetinde mukarrer olan dört bin akçe mehr-i müeccelimi ve bî-vech ahz eylediği bin beş yüz akçe kıymetli kızılcık çuka ferâcemi ve danamı dahi da‘vâ ve taleb eylediğimde ol dahi mehrim olan dört bin akçeden ve zikrolunan feraceden ve karasığır danasından fâriğ olmak üzere hul‘ eyledi ve ben dahi hul‘u kabûl etmekle zimmeti berî olmuşdur deyu beynimizde münâza‘ât-ı kesîre ve muhâsamât-ı şedîde vâki‘ olmuşdu el-hâletü hâzihî beynimize muslihûn tavassut edip da‘vâ-yı mezkûrumdan beni bin sekiz yüz akçe üzerine inşâ-i akd-i sulh eylediklerinde ben dahi sulh-ı mezbûru kabûl ve bedel-i sulh olan meblağ-ı [130b] mezbûr bin sekiz yüz akçe[yi] mezbûr Hüseyin yedinden alıp kabz edip husûs-ı mezbûra müte‘allika da‘vâdan mezbûr Hüseyin’in zimmetini ibrâ-i âm ile ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb sebt olundu. Fî gurreti’l-Muharremi’l-harâm li-sene tis‘a ve sittîn ve elf. Şühûdü’l-hâl: Hızır [b.] Sefer, Ahmed [b.] Hasan, Mehmed [b.] Bâli, Mehmed [b.] Resul, Mehmed [b.] Mustafa.