Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 749 Hüküm no: 838 Orijinal metin no: [132a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Bican v. Avganoz’un ortağının oğlu Safer’in zimmetinde kalan alacağını tahsil etmek üzere varisleri tarafından vekil tayin olunan diğer ortağı Kesdestor v. Bağdaser’in zimmetinin ibra edildiği Edirne’de el-Hâc Doğan mahallesi sâkinlerinden olup bundan akdem ticâret tarîkiyle diyâr-ı Hindistân’a gidip ânda hâlik olan Bican v. Avganoz nâm Ermeni’nin verâseti zevce-i metrûkesi Hanımbey bt. Becam nâm Ermeniye ve sulbî oğlu Avganoz nâm zimmîye münhasıra olduğu şer‘an müte‘ayyin oldukdan sonra mezbûrân meclis-i şer‘de hâlik-i mezbûrun şerîki olan Kesdestor v. Bağdaser nâm Ermeni mahzarında herbiri ikrâr ve takrîr-i kelâm edip mûrisimiz hâlik-i mezbûr diyâr-ı Hind’de hâlik oldukda yedinde mevcûd olan altı yüz elli kıt‘a riyâlî guruşu ibn-i şerîk-i âharı olan Safer nâm Ermeni ahz u kabz etmekle meblağ-ı mezbûru taleb ve da‘vâ ve ahz u kabza ve bize îsâle mezbûr Kesdestor’u vekîl edip ol dahi vekâleten ahz u kabz ve meblağ-ı mezbûrdan emrimiz ile harc-ı râh ve sâir levâzım-ı zarûriyyeye yüz elli guruş harc u sarf edip bâkī beş yüz kıt‘a riyâlî guruşu târih-i kitâbdan bir sene mukaddem merkūm Kesdestor’un yedinden bi’t-tamâm alıp kabz eylemişidik hâlâ zikrolunan beş yüz kıt‘a guruşa ve emrimiz ile harc-ı râh ve sâir levâzım-ı zarûriyyeye harc u sarf eylediği yüz elli guruşa müte‘allika olan da‘vâdan mezbûrun zimmetini ibrâ-i âm ile ibrâ ve ıskāt eyledik dediklerinde gıbbe’t-tasdîkı’ş-şer‘î mâ-vaka‘a [bi’t-taleb ketb olundu.] [Fî] gurreti’l-Muharremi’l-harâm li-sene tis‘a ve sittîn ve elf. Şühûdü’l-hâl: Mehmed b. İbrahim, Seyyid Mustafa, Ali Bey, Ca‘fer [b.] Abdullah, Bayram Beşe.