Bab Mahkemesi 54 Numaralı Sicil (H. 1102 / M. 1691) cilt: 20, sayfa: 311 Hüküm no: 371 Orijinal metin no: [63b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Mustafa ile Hasan Beşe b. Mahmud arasında sulh olması Mahrûse-i Galata’ya tâbi‘ Tophâne’de sâkine Fâtıma bt. Mustafa nâm hâtun ba‘de’t-ta‘rîfi’ş-şer‘î meclis-i şer‘-i şerîf-i enverde, işbu bâ‘isü’l-kitâb Hasan Beşe b. Mahmud nâm râcil mahzarında ikrâr-ı tâm ve takrîr-i kelâm edip, mezbûr Hasan Beşe zimmetinde cihet-i karz-ı şer‘îden yüz yetmiş esedî guruş hakkım olup, meblağ-ı mezbûru taleb ve da‘vâ eylediğimde beynimizde münâza‘ât-ı kesîre cereyân etmişdi. El-hâletü hâzihî muslihûn tavassut edip da‘vâ-yı mezkûrumdan mezbûr Hasan Beşe ile beynimizde kırk guruş üzerine akd-i musâlaha olundukda, ben dahi sulh-ı mezbûru kabûl ve bedel-i sulh olan meblağ-ı mezbûr kırk guruşu yedinden alıp kabz edip ziyâdeye ve sâir ahz ve i‘tâya müte‘allika cemî‘ da‘vâdan mezbûr Hasan Beşe’yi ibrâ-i âmm-ı kātı‘ü’n-nizâ‘la ibrâ ve iskāt eyledim. Min ba‘d mezbûr ile da‘vâ ve nizâ‘ım kalmadı dedikde, gıbbe’t-tasdîki’l-mu‘teber mâ vaka‘a bi’t-taleb ketb olundu. Fi’l-yevmi’s-sâlis ve’l-ışrîn min Cumâdelâhire sene 1102. Şuhûdü’l-hâl: Ahmed Çelebi b. el-Hâc Mahmud, Mustafa Beşe b. Oruç, İbrahim Çelebi b. Ahmed, İbrahim Çelebi b. Mehmed ve gayruhüm.