Bab Mahkemesi 54 Numaralı Sicil (H. 1102 / M. 1691) cilt: 20, sayfa: 311 Hüküm no: 372 Orijinal metin no: [63b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Abdullah ait evin varislerine intikali Mahmiye-i İstanbul’da Hoca Hayreddin mahallesinde sâkine iken bundan akdem vefât eden Dülger Mehmed b. Abdullah’ın verâseti, sulbî kebîr oğulları Ahmed ve Osman ve Sâlih ve Sefer ve el-Hâc Mehmed ile sulbiye kızları Meryem ve Ümmühâni’ye münhasıra olup, ba‘dehû mezbûre Ümmühâni Hâtun mahalle-i mezbûrede vâki‘ lede’l-ahâlî ve’l-cîrân ma‘lûmü’l-hudûd binâsı mülk ve arsası mahalle-i mezbûre câmi‘i evkāfına ayda altmış akçe icâre-i müeccelesi olan menzilden hisse-i şâyi‘asın kız karındaşı mezbûre Meryem Hâtun’a beynlerinde ma‘lûm semen-i medfû‘a bey‘ ve teslîm, ol dahi iştirâ ve tesellüm ve kabûl eylediğinden sonra mezbûre Meryem Hâtun dahi fevt olup, verâseti sulbî kebîr oğlu Mustafa Çelebi’ye münhasıra olduğu şer‘an zâhir ve mütehakkik oldukdan sonra işbu bâ‘isü’l-kitâb mezbûr Mustafa Çelebi meclis-i şer‘-i şerîf-i enverde, vakf-ı mezbûr mütevellîsi olan işbu Abdülkerim hâzır olduğu hâlde el-Hâc Mehmed b. Abdullah nâm kimesne mahzarında üzerine da‘vâ ve takrîr-i kelâm edip, mârru’z-zikr [64a] menzilden vâlidem müteveffât-ı mezbûrenin altı sehimden bir sehim hisse-i şâyi‘ası irsen bana intikāl etmekle, mezbûr el-Hâc Mehmed bi gayri hak zabt ve tasarruf eder, hâlâ suâl olunup kasr-ı yedine ve menzil-i mezkûrun altı sehimden bir sehmi vâlidem müteveffât-ı mezbûre Meryem’den bana intikāl eden hisse-i şâyi‘amı teslîme mezbûr el-Hâc Mehmed’e tenbîh olunmak matlûbumdur dedikde, gıbbe’s-suâl mezbûr el-Hâc Mehmed cevâbında, kaziyye minvâl-i muharrer üzre olup bi tav‘ıhî ikrâr ve i‘tirâf etmeğin, mûcebince mezbûr el-Hâc Mehmed’in kasr-ı yedine ve menzil-i mezkûrun altı sehimden bir sehim hissesin müdde‘î-i mezbûr Mustafa Çelebi’ye taslîte ba‘de’l-hükm ve’t-tenbîh, mâ vaka‘a bi’t-taleb ketb olundu. Fî gurre-i Cumâdelâhire sene 1102. Şuhûdü’l-hâl: İbrahim Çelebi b. Ahmed, İbrahim Çelebi b. Mehmed, Ali Çelebi b. Bâli, Mustafa b. Şaban ve gayruhüm.