Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 755 Hüküm no: 849 Orijinal metin no: [134a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kıptî Raziye bt. Bali’nin kocası Kaplan’ın sattığı bağ bedelinden Palaşto v. Todori zimmetinde kalan yüz elli akçeyi alıp zimmetini ibra ettiği Medîne-i Dimetoka muzâfâtından Vidhor nâm karyede sâkine Râziye bt. Bâli nâm Kıbtiye meclis-i şer‘de karye-i merkūme sükkânından bâ‘isü’r-rakīm Palaşto v. Todori nâm zimmî muvâcehesinde ikrâr ve takrîr-i kelâm edip karye-i mezbûre sınırında vâki‘ bir tarafdan Bulut nâm zimmî bağı ve bir tarafdan Şeftali nâm zimmî bağı ve bir tarafdan Şodvilo nâm zimmî bağı ve bir tarafdan Arnavud Venika nâm zimmî bağı ile mahdûd bir buçuk dönüm mülk bağımı târih-i kitâbdan sekiz sene mukaddem işbu hâzır bi’l-meclis zevcim Kaplan nâm Kıbti merkūm Palaşto’ya dört bin akçeye bey‘ ve teslîm ol dahi iştirâ ve tesellüm eyledikden sonra merkūm Kaplan semen-i mezbûrdan üç bin sekiz yüz elli akçesini ahz u kabz edip bâkī zimmetinde yüz elli akçe kalmışidi hâlâ meblağ-ı mezbûru ben mücîze olup semen-i merkūmdan bâkī yüz elli akçeyi mezbûr Palaşto yedinden ahz u kabz eyledim min-ba‘d bağ-ı mezbûra müte‘allik da‘vâ ve nizâ‘ım yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî gurreti’l-Muharremi’l-harâm li-sene tis‘a ve sittîn ve elf. Şühûdü’l-hâl: İlyas Efendi, Ahmed Çelebi b. ( ), Mehmed Çelebi b. ( ), Mehmed Efendi, Bayram Beşe, İlyas Beşe.