Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 756 Hüküm no: 850 Orijinal metin no: [134a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Abdülcelil b. Ömer’in kardeşi Abdülcelil ile birlikte tasarrufunda olan vakıf menzil hissesini hayatta iken kardeşine ücreti karşılığında devrettiği Mahmiye-i Edirne’de Sarıca Paşa mahallesi sâkinlerinden olup ticâret tarîkiyle [gittiği] Haleb-i şehbâ’da bundan akdem vefât eden el-Hâc Abdülcelil b. Ömer nâm kimesnenin sulbî oğulları İbrahim ve İsmail nâm sagīrlerin kıbel-i şer‘den mansûbe vasîleri olan vâlideleri Belkıs bt. Abdullah nâm hâtun meclis-i şer‘de müteveffâ-yı mezbûrun li-ebeveyn karındaşı işbu râfi‘ü’r-rakīm Safiyyüddin nâm kimesne mahzarında bi’l-vesâye üzerine da‘vâ ve takrîr-i kelâm edip merhûm [ve] mağfûrun-leh Sultân Selim Hân’ın evkāf-ı şerîfelerinden olup bir tarafdan merhûm-ı müşârun-ileyh medresesinin müderrisine meşrûta vakıf menzile ve bir tarafdan [134b] Yunuszâde Mehmed Efendi mülküne ve bir tarafdan Yahyazâde Mehmed Efendi mülküne ve bir tarafdan tarîk-ı âm ile mahdûd iki fevkānî ve iki tahtânî odaları ve iki sofayı ve bir ahırı ve bi’r-i mâyı ve kenîfi müştemil menzile on iki bin akçe icâre-i mu‘accele ve beher mâh altı akçe ücret-i müeccele ile müteveffâ-yı mezbûr Abdülcelil ve merkūm Safiyyüddin ale’l-iştirâki’s-seviy mutasarrıflar iken mezbûr Abdülcelil fevt olmağla menzil-i mezbûrun nısf hissesinin hakk-ı tasarrufu sagīrân-ı mezbûrâna intikāl-i âdî ile intikāl etmişiken merkūm Safiyyüddin bi-gayri vechin vaz‘-ı yed eylemişdir suâl olunup nısf-ı menzil-i mezbûrun tasarruf[un]dan kasr-ı yedine tenbîh olunmak matlûbumdur dedikde gıbbe’s-suâl mezbûr Safiyyüddin cevâbında fi’l-vâki‘ vech-i muharrer üzere zikri mürûr eden menzile li-ebeveyn karındaşım müteveffâ-yı mezbûr Abdülcelil ile ale’l-iştirâki’s-seviy mutasarrıf idik ve lâkin hayâtında târih-i kitâbdan sekiz sene mukaddem menzil-i mezbûrun nısf hissesinin hakk-ı tasarrufunu mezkûr Abdülcelil vakf-ı mezbûr mütevellîsi Hasan Ağa ma‘rifetiyle altı bin akçe bedel mukābilesinde [bana] ferâğ ve tefvîz edip ben dahi tefevvüz ve kabûl eyleyip hakk-ı tasarrufu benimdir dedikde isre’l-istintâk ve’l-inkâr merkūm Safiyyüddin’den müdde‘âsını mübeyyine beyyine taleb olundukda udûl-i ricâl-i Müslimînden mahmiye-i mezbûrede Korucu Doğan mahallesinde sâkin Ramazan b. Abdullah ve Câmi‘-i Atîk mahallesinde sâkin es-Seyyid Abdurrahman Çelebi b. es-Seyyid Abdürrahim nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ müteveffâ-yı mezbûr Abdülcelil hayâtında târih-i kitâbdan sekiz sene mukaddem bizim huzûrumuzda karındaşı merkūm Safiyyüddin [ile] iştirâk-i seviyy üzere mutasarrıf olduğu menzil-i mezbûrun nısf hissesinin hakk-ı tasarrufunu vakf-ı mezbûr mütevellîsi olan Hasan Ağa ma‘rifetiyle altı bin akçe bedel mukābilesinde mezkûr Safiyyüddin’e ferâğ ve tefvîz edip ol dahi tefevvüz ve kabûl eyleyip mütevellî-i merkūm ma‘rifetnâme dahi verdi biz bu husûsa bu vech üzere şâhidleriz şehâdet dahi ederiz deyu herbiri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiye şehâdetleri makbûle olmağın bî-vech mu‘ârazadan men‘ birle mâ-vaka‘a bi’t-taleb ketb olundu. Hurrire fî gurreti’l-Muharremi’l-harâm li-sene tis‘a ve sittîn ve elf. Şühûdü’l-hâl: Mehmed Efendi, Kutbeddîn İsmail el-Kādî bi-medîneti Teşene sâbıkā, Kadri Çelebi, İsa Bey, Bayram Beşe.