Bab Mahkemesi 54 Numaralı Sicil (H. 1102 / M. 1691) cilt: 20, sayfa: 312 Hüküm no: 373 Orijinal metin no: [64a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali b. Abdullah’ın Hacı Mehmed b. Süleyman ve Hasan’a olan borcunu varislerine ödemesi Mahmiye-i İstanbul’da el-Hâc Muhyiddin mahallesinde sâkin iken bundan akdem vefât eden el-Hâc Mehmed b. Süleyman’ın verâseti, kebîr oğlu diğer Süleyman’a ve kebîre kızı Emine’ye münhasıra olup ve müteveffâ-yı mezbûrun ticâretde şerîki iken vefât eden Hasan b. Hüseyin nâm kimesnenin dahi verâseti oğlu Hüseyin Çelebi’ye münhasıra olduğu mütehakkik oldukdan sonra mezbûr Hüseyin Çelebi asâleten ve mezkûr Süleyman dahi kendi tarafından asâleten ve kız karındaşı merkūme Emine’nin vekîl-i müsecceli olmağla vekâleten meclis-i şer‘-i şerîfde, Ali b. Abdullah nâm kimesne mahzarında her biri üzerine da‘vâ ve takrîr-i kelâm edip, şerîkler iken vefât eden mûrislerimiz mezbûrân Hasan ve el-Hâc Mehmed’in temessük nâtık olduğu üzre mezbûr Ali zimmetinde beynlerinde ma‘lûm kereste bahâsından yirmi bin dokuz yüz akçe hakları olup, kable’l-ahz ikisi dahi vefât edip meblağ-ı mezbûr vech-i meşrûh üzre bize intikāle etmekle, suâl olunup meblağ-ı mezbûrun alıverilmesi matlûbumdur dediklerinde, gıbbe’s-suâl mezbûr Ali cevâbında, fi’l-hakīka müteveffân-ı mezbûrâna mârru’z-zikr kereste bahâsından el-ân yirmi bin dokuz yüz akçe zimmetinde deyni olup ve mezbûrûnun vârisleri dahi ikrâr ve i‘tirâf etmeğin, alâ mûcebi ikrârihî temessük nâtık olduğu üzre meblağ-ı mezbûr yirmi bin dokuz yüz akçeyi müdde‘iyân-ı mezbûrâna edâ ve teslîme merkūm Ali’ye tenbîh olunmağın, mâ vaka‘a bi’t-taleb ketb olundu. Fi’l-yevmi’t-tâsi‘ aşer min Cumâdelâhire sene 1102. Şuhûdü’l-hâl: Ömer Çelebi b. ( ), Mehmed Çelebi b. ( ), Ali Çelebi, Derviş Beşe ve gayruhüm.