Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 757 Hüküm no: 852 Orijinal metin no: [135a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kadı Mehmed Efendi b. Ali’nin haksız yere para ve eşyasını aldığı iddiasıyla Mehmed Paşa aleyhine açtığı davada iddiasını ispat edemediği Oldur ki Vilâyet-i Rumeli’nde Ayamavra kazâsı muvakkati olan Mehmed Efendi b. Ali nâm kimesne ordu-yı hümâyûnda meclis-i şer‘de hâlâ Ohri sancağına mutasarrıf olan işbu sâhibü’l-kitâb emîrü’l-ümerâ’i’l-kirâm kebîru’l-küberâ’i’l-fihâm Yusuf Beyzâde Mehmed Paşa mahzarında üzerine da‘vâ ve takrîr-i kelâm edip mûmâ-ileyh Mehmed Paşa ben Karadağ kādısı iken bi-gayri vech-i şer‘î benim Barlı Hüseyin nâm kimesne yediyle bir pastav mor çuka ve bir pastav benefş çuka ve on sekiz hazîneli bir çerge ve Ali nâm kimesne yediyle beş yüz riyâlî guruş ve benim yedimden dahi bir pastav kırmızı altmış çile çuka ve bir donluk kırmızı kadîfe ve yüz yetmiş riyâlî guruşu ahz eylemişdir suâl olunup alıverilmek matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda ikāmet-i beyyineden izhâr-ı acz edip istihlâf etmeğin müdde‘î-i merkūmun vech-i muharrer üzere Barlı Hüseyin nâm kimesne yediyle bir pastav mor çuka ve bir pastav benefş çuka ve on sekiz hazîneli bir çerge ve Ali nâm kimesne yediyle beş yüz riyâlî guruşu ve kendi yedinden bir pastav kırmızı altmış çile çuka ve bir donluk kırmızı kadîfe ve yüz yetmiş riyâlî guruşu bi-gayri vechin ahz eylemediğini müşârun-ileyh Mehmed Paşa’ya yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin bî-vech ta‘arruzdan men‘ olunup mâ-vaka‘a bi’t-taleb ketb olundu. Fi’l-yevmi’l-ışrîn mine’l-Muharremi’l-harâm li-sene tis‘a ve sittîn ve elf. Şühûdü’l-hâl: Emîru’l-ümerâ’i’l-kirâm Sinan Paşa, Hasan Ağa b. Hüseyin, İsmail Ağa b. Hüseyin, Ahmed b. Mehmed el-mübâşir, İbrahim Ağa b. Süleyman ve gayruhüm mine’l-[hâzırîn.]