Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 761 Hüküm no: 855 Orijinal metin no: [137a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma bt. Kadri’nin Mustafa Beşe tarafından çalındıktan sonra Ahmed Beşe’ye rehin verilen altın bileziğinin kendisine iadesi Mahmiye-i Edirne’de İlyas mahallesinde sâkine Fâtıma bt. Kadri nâm hâtun meclis-i şer‘de Ahmed Beşe mahzarında da‘vâ eder ki silk-i mülkümde münselik kırk guruş kıymetli bir zümrüdlü altı bileziğimi gāib ani’l-meclis Mustafa Çavuş nâm kimesne gasb edip merkūm Ahmed’e sekiz yüz akçe mukābilesinde rehin vaz‘ ve teslîm edip ol dahi irtihân ve kabz eylemişdir hâlâ zikrolunan bileziği mezbûr Ahmed’den taleb ederim suâl olunsun dedikde gıbbe’s-sul mezbûr Ahmed Beşe cevâbında zikrolunan bilezik mezbûre Fâtıma’nın mülküdür ve lâkin kendi izniyle mezbûr Mustafa Çavuş sekiz yüz akçe mukābilesinde bana rehin vaz‘ [ve] teslîm ve ben dahi kabz eylemişimdir dedikde isre’l-istintâk ve’l-inkâr merkūm Ahmed Beşe’den sıdk-ı makālini mübeyyine beyyine taleb olundukda ikāmet-i beyyine için izhâr-ı acz edip istihlâf etmeğin müdde‘iye-i merkūmeye vech-i muharrer üzere zikrolunan bileziğini mezbûr Ahmed Beşe’ye sekiz yüz akçe mukābilesinde merkūm Mustafa Beşe’ye rehin vaz‘ etmeğe izin vermediğine yemîn teklîf olundukda ol dahi hasbe’l-mes’ûl yemîn billâhi te‘âlâ etmeğin zikrolunan bileziği merkūme Fâtıma’ya [teslîme] tenbîh birle mâ-vaka‘a bi’t-taleb ketb olundu. [Fî] gurreti’l-Muharremi’l-harâm li-sene tis‘a ve sittîn ve elf. Şühûdü’l-hâl: Ahmed b. Hasan, İsa b. Mehmed, Hasan b. Hüseyin, Ömer b. Hasan.