Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 762 Hüküm no: 856 Orijinal metin no: [137a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sipahi Halil b. İbrahim’in borcuna kefil olduğu Mehmed Çelebi’den yüz doksan guruş alacağı olduğu Zümre-i sipâhiyândan Halil b. İbrahim meclis-i şer‘de Mehmed mahzarında üzerine da‘vâ ve takrîr-i kelâm edip gāib ani’l-meclis Ahmed Beşe nâm kimesne merkūm Mehmed’e yüz doksan kıt‘a riyâlî guruş ikrâz ve teslîm edip ol dahi istikrâz ve kabz edip ve meblağ-ı mezbûra emr ve kabûlü hâviye kefâlet-i sahîha-i şer‘iyye ile ben kefîl olmağla merkūm Ahmed Beşe dahi Vilâyet-i Anadolu’da Uşak kādısı huzûrunda meblağ-ı mezbûr yüz doksan kıt‘a riyâlî guruşu kefâletim hasebiyle benden da‘vâ ve taleb ve edâsına hükm-i şer‘î lâhık oldukdan sonra meblağ-ı mezbûr yüz doksan kıt‘a riyâlî guruşu cihet-i kefâletden edâ ve teslîm eylediğim cihetden mezbûr Mehmed Çelebi’den taleb ederim suâl olunup alıverilmek matlûbumdur dedikde gıbbe’s-suâl mezbûr Mehmed cevâbında fi’l-vâki‘ vech-i muharrer üzere merkūm Ahmed’e yüz doksan kıt‘a riyâlî guruş deynim olup ve meblağ-ı mezbûra merkūm Halil emr ve kabûlü hâviye kefâlet-i sahîha ile kefîl [olduğunu] ikrâr ve kefâleti hasebiyle meblağ-ı mezbûru edâsını inkâr edicek müdde‘î-i mezbûrdan müdde‘âsını mübeyyine beyyine taleb olundukda udûl-i ricâlden Ahmed b. Kulu ve İvaz b. Hanbey nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ mezbûr Ahmed merkūm Mehmed Çelebi’ye zimmetinde olan yüz doksan kıt‘a riyâlî guruşu mezbûr Halil Bey’den Uşak kādısı huzûrunda kefâleti hasebiyle da‘vâ ve taleb eylediğinde edâsına hükm-i şer‘î lâhık oldukdan sonra bizim huzûrumuzda merkūm Ahmed Beşe meblağ-ı merkūm yüz doksan kıt‘a riyâlî guruşu mezbûr Halil Bey yedinden bi’t-tamâm ahz u kabz eyledi biz bu husûsa bu vech üzere şâhidleriz şehâdet dahi ederiz deyu herbiri edâ-i şehâdet-i şer‘iyye ettiklerinde gıbbe ri‘âyeti şerâiti’l-kabûl [şehâdetleri] makbûle olmağın mûcibiyle hüküm birle mâ-vaka‘a bi’t-taleb ketb olundu. Fî gurreti’l-Muharremi’l-harâm li-sene 1069. Şühûdü’l-hâl: Ahmed [b.] Hasan, İsa [b.] Mehmed, Hüseyin [b.] Ömer, Ahmed [b.] Hasan, Ahmed [b.] Mehmed, Hasan b. Hüseyin.