Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 762 Hüküm no: 857 Orijinal metin no: [137b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Bey b. Mehmed’in haksız yere para, at ve eşyasını aldığı iddiasıyla Çankırı Sancağı Mutasarrıfı Muslı Paşa aleyhine açtığı davada iddiasını ispat ettiği Vilâyet-i Anadolu’da medîne-i Kayseriye’de sâkin Mustafa Bey b. Mehmed nâm kimesne ordu-yı hümâyûnda meclis-i şer‘de hâlâ Kangırı (Çankırı) sancağına mutasarrıf olan emîrü’l-ümerâ’i’l-kirâm kebîru’l-küberâ’i’l-fihâm Muslı Paşa tarafından husûmet [ve] redd-i cevâba vekîl olup Mehmed b. Ali ve Mehmed b. Hasan nâm kimesneler şehâdetleriyle şer‘an vekâleti sâbite olan Bektaş Bey b. Timur nâm kimesne mahzarında üzerine da‘vâ ve takrîr-i kelâm edip müvekkil-i müşârun-ileyh Muslı Paşa târih-i kitâbdan üç sene mukaddem kasaba-i Karahisar-ı sâhib’de sâkin olduğu hâlde benim bi-gayri vech-i şer‘î altmış guruş kıymetli bir doru at ve yirmi beş guruş kıymetli bir sîm kılıç ve bin akçe kıymetli bir kalkan ve on beş riyâlî guruşu kıymetli bir yeşil çuka tilki kürkü kaplı sirvâli ve beş riyâlî guruş kıymetli bir kırmızı mukaddem kuşak ve iki riyâlî kıymetli kadîfe kavuk ve yirmi aded frengi altın ve dokuz esedî guruşumu ahz u kabz etmekle hâlâ taleb ederim suâl olunup alıverilmek matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda udûl-i ricâlden Hüseyin Bey b. Osman ve İbrahim Bey b. Abdullah nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ müvekkil-i müşârun-ileyh Muslı Paşa târih-i kitâbdan üç sene mukaddem kasaba-i Karahisar-ı sâhib’de sâkin olduğu hâlde bizim huzûrumuzda müdde‘î-i mezbûr Muslı Bey’in bî-gayrı vechi şer‘î altmış riyâlî guruş kıymetli bir doru at ve yirmi beş riyâlî guruş kıymetli bir sîm kılıç ve bin akçe kıymetli bir kalkan ve on beş riyâlî guruş kıymetli bir yeşil çukaya tilki kürkü kaplı sirvâli ve beş riyâlî guruş kıymetli bir kırmızı mukaddem kuşak ve iki riyâlî guruş kıymetli bir kadîfe kavuk ve yirmi aded frengi altın ve dokuz esedî guruşuna ahz u kabz eyledi biz bu husûsa bu vech üzere şâhidleriz şehâdet dahi ederiz deyu herbiri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiye şehâdetleri mûcebince ba‘de’l-hükm mâ-vaka‘a bi’t-taleb ketb olundu. Fi’l-ışrîn mine’l-Muharremi’l-harâm li-sene tis‘a ve sittîn ve elf. Şühûdü’l-hâl: Mehmed Efendi b. Mustafa, İsmail Efendi b. Hürrem, Ali Bey, Süleyman Çelebi, Selman Çelebi.