Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 763 Hüküm no: 858 Orijinal metin no: [137b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin b. Abdullah’ın para ve eşya alacağı olduğu iddiasıyla Ali Ağa b. Osman aleyhine açtığı davada davalının ikrar ettiği kısmının davacıya ödenmesi Vilâyet-i Anadolu’da Sivas kazâsına tâbi‘ Darıkolu nâm karyede sâkin işbu bâ‘isü’l-kitâb Hüseyin b. Abdullah nâm kimesne ordu-yı hümâyûnda meclis-i şer‘de Ali Ağa b. Osman nâm kimesne mahzarında üzerine da‘vâ ve takrîr-i kelâm edip mezbûr Ali Ağa zimmetinde iki bin akçe hakkım olup ve silk-i mülkümde münselik olan eşyâmdan beş yüz akçe kıymetli bir mâ’î Londra kontoş ve yine üç yüz akçe kıymetli bir mâ’î kontoş ve elli akçe kıymetli heğbe ve iki yüz akçe [138a] kıymetli iki tüfenk ve yüz akçe kıymetli bir eyer ve bir gra kılıç yedinde kalmağla hâlâ taleb ederim suâl olunup alıverilmek matlûbumdur dedikde gıbbe’s-suâl mezbûr Ali cevâbında müdde‘î-i mezbûra ancak bin iki yüz akçe deynim olup ve silk-i mülkünde münselik eşyâsından beş yüz akçe kıymetli bir mâ’î kontoş ve yine üç yüz akçe kıymetli bir mâ’î kontoş ve elli akçe kıymetli bir eğer ve bir kara kılıç yedimde vardır ikrâr ve para sekiz yüz akçeyi inkâr edicek müdde‘î-i mezbûrdan ziyâdeyi mübeyyine beyyine taleb olundukda ikāmet-i beyyine için istimhâl etmeğin mehl-i şer‘î ile imhâl olundukdan sonra ikrârı mûcebince bin iki yüz akçeyi ve zikrolunan eşyâyı müdde‘î-i merkūma teslîme tenbîh birle mâ-vaka‘a bi’t-taleb ketb olundu. Fi’l-âşir mine’l-Muharremi’l-harâm li-sene tis‘a ve sittîn ve elf. Şühûdü’l-hâl: Mehmed b. Mustafa, Kutb[eddin] İsmail b. Hürrem, İsa Bey b. Ahmed, Ca‘fer b. ( ), Süleyman.