Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 764 Hüküm no: 859 Orijinal metin no: [138a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Radoso’nun Çorbacızâde Hacı Mehmed b. Ali’ye bir aylığına kiraya verdiği iki atını ve kira ücretini teslim aldığı Vilâyet-i Rumeli’nden Karlofça kazâsına tâbi‘ Pazviçe nâm karye ahâlîsinden olup Radoso nâm zimmînin sulbî oğlu ve kıbelinden zikri âtî iki re’s bârgir ile ücretleri olan yirmi esedî guruşu ahz u kabza vekîl-i sâbitü’l-vekâle olan Yako nâm zimmî meclis-i şer‘-i hatîr-i lâzimü’t-tevkīrde işbu bâ‘isü’l-kitâb Çorbacızâde demekle meşhûr el-Hâc Mehmed b. Ali nâm kimesne mahzarında bi’l-vekâle ikrâr ve i‘tirâf edip babam mezkûr Radoso feth-i cedîd olan Yanova Kal‘ası kurbünde iki re’s bârgiri bir ay tamâmına değin yirmi esedî guruşa îcâr ol dahi istîcâr ve kabûl edip hâlâ zimmetinde müctemi‘ olan yirmi esedî guruş ile zikri sebk eden iki re’s bârgiri bana teslîm ve ben dahi yedinden ahz u kabz eyledim dedikde mâ-vaka‘a bi’t-taleb ketb olundu. Fi’s-sâbi‘ aşer mine’l-Muharremi’l-harâm li-sene tis‘a ve sittîn ve elf. Şühûdü’l-hâl: Osman Çelebi b. Mehmed, Abdülkadir Çelebi b. Hamza, Mustafa Çelebi [b.] İbrahim ve gayruhüm.