Bab Mahkemesi 54 Numaralı Sicil (H. 1102 / M. 1691) cilt: 20, sayfa: 313 Hüküm no: 374 Orijinal metin no: [64a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ebûbekir b. Abdullah’ın kaybolan kölesi hususundaki iddiasının reddi Mahmiye-i İstanbul’da Aksaray kurbunda sâkin Ebûbekir b. Abdullah nâm kimesne meclis-i şer‘-i şerîf-i enverde, dergâh-ı âlî yeniçerilerinin Atmeydanı kasablarından Yorgi v. Panayot nâm zımmî muvâcehesinde üzerine da‘vâ ve takrîr-i kelâm edip, tahmînen on dört yaşlarında ve yüz guruş kıymetli Lehiyyü’l-asl Mehmed b. Abdullah nâm abd-i memlûküm târih-i kitâbdan iki ay mukaddem mülkümden ibâk etmekle, mezbûr Yorgi ahz ve tağyîb etmekle, hâlâ suâl olunup mûceb-i şer‘îsi icrâ olunmak matlûbumdur dedikde, gıbbe’s-suâl ve akībe’l-inkâr müdde‘î-i mezbûrdan müdde‘âsına mutâbık beyyine taleb olundukda, ityân-ı beyyine için istimhâl etmeğin, mehl-i şer‘î ile imhâl olunup, müddet-i mehil münkaziye olup, ityân-ı beyyineden aczi mütehakkik oldukdan sonra istihlâf etmeğin, fi’l-hakīka müdde‘î-i mezbûrun ibâk edip tahmînen on dört yaşında olan Lehiyyü’l-asl Mehmed b. Abdullah nâm abd-i memlûkünü ahz ve ihfâ ve yâhud âhara bey‘ ile tağyîb eylemediğine* merkūm Yorgi’ye yemîn teklîf olundukda, ol dahi hasbe’l-mes’ûl yemîn billâhi’llezî enzele’l-incîle alâ İsâ -aleyhi’s-selâm- etmeğin, mûcebiyle müdde‘î-i mezkûr bilâ-beyyine bî-vech mu‘ârazadan men‘ olunup, mâ vaka‘a bi’t-taleb ketb olundu. Fi’l-yevmi’l-ışrîn min Cumâdelâhire sene 1102. Şuhûdü’l-hâl: Sâlih Çelebi, Ahmed Çelebi b. Ahmed, İsmail Çelebi b. Mustafa, Çavuş Mehmed Çelebi b. Derviş, İbrahim Çelebi b. Ahmed.