Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 765 Hüküm no: 861 Orijinal metin no: [138b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hazine kethüdası Merhum Hüseyin Ağa’nın miri tarafından el konulduktan sonra satılan mülk menzilini alan Osman Bey’e Hüseyin Ağa’nın varisi ve kız kardeşi Selimhan’ın müdahalesinin önlenmesi Fi’l-asl Burgos kasabasından olup Dergâh-ı âlî dâme mahfûfen bi’l-me‘âlî kapıcıbaşılarından iken bundan akdem fevt olan merhûm Hüseyin Ağa’nın li-ebeveyn kız karındaşı olup vârisi olan Selimhan bt. Arpacı Mehmed mahzarında yine kasaba-i mezbûre sâkinlerinden Osman Bey b. Abdullah el-cündi tarafından vekîl olup Hüseyin Efendi b. Abdullah el-imâm ve el-Hâc Ahmed b. Mustafa el-müezzin şehâdetleri ile vekâleti sâbite olan Ali Bey b. Abdullah nâm râcil meclis-i şer‘-i şerîfde bi’l-vekâle üzerine da‘vâ ve takrîr-i kelâm edip mezbûr Hüseyin Ağa sâbıkā hazîne kethüdâsı iken hazîne-i pâdişâhîde hufyeten ahz u istihlâk eylediği mâl-ı terekesin istiğrâk etmekle cümle muhallefâtı taraf-ı mîrîden ahz u kabz olundukdan sonra emr-i celîlü’l-kadr-i hakanî ile cümle emlâkin fürûhta me’mûr olan Salih Ağa b. Fazlullah yedinden kasaba-i mezbûrede vâki‘ bir tarafı Malkoç Bey mülkü ve bir tarafı Ali Çelebi el-cündi mülkü ve bir tarafı diğer Ali Bey mülkü ve bir tarafı tarîk-ı âm ile mahdûd hâriciyesi iki bâb tahtânî oda ve bir sofa ve bir ahır ve bir anbarı muhtevî ve dâhiliyesi altı bâb tahtânî oda ve bir sofa ve bir kiler ve bir soba ta‘bîr olunur mağsel ve kule ve çeşme ve kenîf ve bir mikdâr bahçeyi müştemil mülk menzili kırk bin fıddî râyic fi’l-vakt akçeye iştirâ ve teslellüm ve kabz-ı mebî‘ edip müvekkilim mezbûr Osman Bey’in tasarrufunda iken merkūm Selimhan babam mezbûr Arpacı Mehmed fevt oldukda bana bi-hasebi’l-irs intikāl eden hisse-i şer‘iyyemi ve menzil-i mezbûru karındaşım müteveffâ-yı merkūm Hüseyin Ağa kebîrimiz olmağla müstakillen zabt ve tasarruf edip yedinde kalmışdır deyu sa‘âdetli ve azametli ve şevketli pâdişâh-ı âlem-penâh ve şehinşâh-i süreyyâ-kadr-i felek-destgâh -dâme mahfûfen bi-avni’l-ilâh- hazretlerine arzuhâl edip menzil-i mezbûr kendiye babasından intikāl etmeyip mezbûr Hüseyin Ağa’nın kendi mülk-i müşterâsı iken fevt oldukda hazîneden ahz ve istihlâk eylediği mâl mukābilesinde mîrîden zabt olunmuşiken hilâf-ı inhâ ile menzil-i mezbûru yedimden ahz u kabz eylemişdir suâl olunup fi’l-hakīka babasından menzil-i mezbûr irsle kendiye intikāl eyledi ise şer‘an beyân eylesin deyu hâlâ fermân-ı âlî sâdır olmuşdur icrâ-yı hak olunmak matlûbumdur dedikde gıbbe’s-suâl mezbûre Selimhan’a menzil-i mezbûru karındaşı müteveffâ-yı merkūm Hüseyin Ağa Burgos sâkinlerinden Mehmed b. Mehmed Çavuş nâm kimesneden iştirâ edip babasından intikāl etmediğini ikrâr ve i‘tirâf etmeğin mâ-hüve’l-vâki‘ bi’t-taleb ketb olundu. Tahrîren fi’l-yevmi’l-hâmis ve’l-ışrîn min şehri Muharremi’l-harâm li-sene tis‘a ve sittîn ve elf. Şühûdü’l-hâl: es-Sâbıkūn.