Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 770 Hüküm no: 867 Orijinal metin no: [139b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hiyanetinden dolayı merhum Hacı Mehmed’in vasiliğinden azlolunan Receb Çelebi b. Hacı Sinan’ın zimmetinde merhumun varislerine ödemesi gereken otuz dokuz bin akçe olduğunu ikrar ettiği Mahmiye-i İstanbul’da Dîvâne Ali mahallesinde sâkin iken bundan akdem vefât eden el-Hâc Mehmed b. el-Hâc Hasan’ın verâseti zevce-i metrûkesi Fâtıma bt. el-Hâc Abdullah ile sulbiye sagīre kızı Hâmide’ye ve li-ebeveyn kız karındaşı Âişe nâm hâtuna münhasıra olduğu şer‘an zâhir ve mütebeyyin oldukdan sonra mezbûre Âişe Hâtun asâleten ve sagīre-i mezbûrenin tesviye-i umûruna vasiyy-i muhtârı olan merkūme Fâtıma Hâtun tarafından husûs-ı âti’l-beyâna sâbitü’l-vekâle vekîl olan es-Seyyid Mustafa Çelebi b. Ahmed vekâleten meclis-i şer‘-i şerîfde müteveffâ-yı mezbûrun techîz ve tekfînine ve zimem-i nâsda olan hukūkunu da‘vâ ve taleb ve ahz u kabz ve vârislerine îsâle sâbıkā vasiyy-i muhtâr olan Receb Çelebi b. el-Hâc Sinan mahzarında herbiri asâleten ve vekâleten üzerine da‘vâ ve takrîr-i kelâm edip mezbûr Receb Çelebi müteveffâ-yı mezbûrun işbu hâzır bi’l-meclis Piyale Bey nâm kimesne zimmetinde karzdan olan bin akçesini ve el-Hâc Hüseyin zimmetinde olan iki bin akçesini ve müteveffâ-yı mezbûrun mahrûse-i Edirne’de zimem-i nâsda olan hukūkunu varıp ahz için mezbûru irsâl eylediğimizde kendiye harc-ı râh için on bin akçe ve Manisa’ya gitdikde kendiye harc-ı râh için beş bin akçe ve bârgir iştirâsı’çün iki bin beş yüz akçe ve müteveffâ-yı mezbûrun vasiyet-i müsbetesi üzere techîz ve tekfînine harc u sarf için yirmi bin akçe ve mahrûse-i mezbûrede zimemden makbûz u olan yüz on sekiz bin iki yüz akçeden zimmetinde bâkī kalan on sekiz bin iki yüz akçe ki cem‘an merkūm Receb Çelebi’ye elli sekiz bin yedi yüz akçe teslîm olunup ol dahi ahz u kabz eyledikden sonra merkūm Receb Çelebi’nin lede’ş-şer‘ hiyâneti zâhir olmağla hâlâ mahmiye-i mezbûrede kassâm-ı askerî olan umdetü’l-müderrisîni’l-kirâm Mehmed Cemalî Efendi vesâyet-i mezbûreden merkūm Receb Çelebi’yi azl eyledikde makbûzu olan meblağ-ı mezbûr elli sekiz bin yedi yüz akçeyi merkūmdan da‘vâ eylediğimizde ol dahi meblağ-ı mezbûr makbûzu olduğunu ikrâr lâkin meblağ-ı mezbûrun on dokuz bin yedi yüz akçesini müteveffâ-yı mezbûrun vesâyeti üzere techîz ve tekfînine ve ıskāt-ı salâtına ve vefâtı günü bekçiye ve üçüncü ve yedinci ve kırkıncı günlerinde ta‘âmiyye ve ta‘âm-ı matbah edenlerin ücretlerine ve sâir levâzım-ı defniyyeye harc u sarf eyledim demişidi hâlâ harc eylediği meblağ-ı mezbûr on dokuz bin yedi yüz akçe müteveffâ-yı mezbûrun cemî‘ mâlının sülüsü müsâ‘id olmağın meblağ-ı mezbûr bizim dahi ma‘lûm ve makbûlümüz olup ba‘de külli hesâb zimmetinde bâkī kalan otuz dokuz bin akçeyi taleb ederiz dediklerinde gıbbe’s-suâl merkūm Receb Çelebi cevâbında fi’l-hakīka kaziyye vech-i meşrûh üzere olup meblağ-ı bâkī otuz dokuz bin akçe zimmetimde lâzimü’l-edâ deynimdir deyu bi-tav‘ihî ikrâr ve i‘tirâf etmeğin mûcibiyle meblağ-ı mezbûr otuz dokuz bin akçeyi edâ ve teslîm üzere mukırr-ı merkūm Receb Çelebi ilzâm olunup mâ-vaka‘a bi’t-taleb ketb olundu. Fi’l-yevmi’l-hâmis aşer min-Saferi’l-hayr li-sene tis‘a ve sittîn ve elf. Şühûdü’l-hâl: Fahrü’l-cüyûş es-Seyyid Mehmed Çavuş b. es-Seyyid Yusuf el-mübâşir, Receb Çavuş b. Mustafa el-mübâşir, Ahmed Beşe b. Mehmed mumcu, es-Seyyid Mehmed Beşe b. es-Seyyid Mustafa el-mübâşir, Ya‘kub Odabaşı b. Hasan odabaşı-i mukır, es-Seyyid Mehmed b. es-Seyyid Halil.