Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 771 Hüküm no: 868 Orijinal metin no: [139b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Çelebi b. Şaban’ın on bir bin beş yüz akçe alacağı olduğu iddiasıyla üvey oğlu İbrahim Çelebi b. Behram aleyhine açtığı davada iddiasını ispat edemediği Mahmiye-i İstanbul’da Keçeci Pîrî mahallesi sâkinlerinden İbrahim Çelebi b. Şa‘ban nâm kimesne meclis-i şer‘-i hatîr-i lâzimü’t-tevkīrde üvey oğlu işbu râfi‘ü’l-kitâb İbrahim Çelebi b. Behram mahzarında üzerine da‘vâ ve takrîr-i kelâm edip mezbûr İbrahim Çelebi’ye mukaddemâ on bir bin beş yüz akçe ikrâz ve teslîm ol dahi istikrâz ve tesellüm etmişidi hâlâ meblağ-ı mezbûru taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan sıdk-ı makāline beyyine taleb olundukda ityân-ı beyyineden izhâr-ı acz ve istihlâf eyledikde mezbûr İbrahim Çelebi’ye müdde‘î-i mezbûrdan on bir bin beş yüz akçe istikrâz ve kabz edip el-ân meblağ-ı mezbûr zimmetinde müdde‘î-i mezbûre deyni olmadığına yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin mûcibiyle müdde‘î-i mezbûr ityân-ı beyyine etmedikçe bî-vech mu‘ârazadan men‘ olunup mâ-vaka‘a bi’t-taleb ketb olundu. Fi’l-yevmi’l-sâmin aşer min-Saferi’l-hayr li-sene tis‘a ve sittîn ve elf. Şühûdü’l-hâl: Salih Beşe b. Ramazan, Mehmed Bey b. Hasan, Nasûh Beşe b. Halil mumcu, Hasan Beşe b. Mehmed ve gayruhüm.