Bab Mahkemesi 54 Numaralı Sicil (H. 1102 / M. 1691) cilt: 20, sayfa: 313 Hüküm no: 375 Orijinal metin no: [64a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice bt. Hacı Süleyman’ın Mehmed Çelebi b. İvaz’dan muhâlaa yoluyla boşanması Dârü’l-hilâfeti’l-aliyye Kostantıniyye el-mahmiye mahallâtından Kürkçübaşı mahallesi sâkinelerinden olup, zâtını ma‘rifet-i şer‘iyye ile ârifân olan mahalle-i mezkûre imâmı Hasan Efendi b. Şaban ve müezzin Mehmed Çelebi b. Mehmed ta‘rîfleriyle mu‘arrefe olan Hatice bt. el-Hâc Süleyman nâm hâtun meclis-i şer‘-i şerîf-i enverde, zevc-i mutallıkı işbu sâhibü’l-kitâb Mehmed Çelebi b. İvaz mahzarında bi tav‘ihâ ikrâr-ı tâm ve takrîr-i kelâm edip, zevcim mezkûr Mehmed Çelebi zimmetinde mütekarrir ve ma‘kūdun aleyh olan iki bin altı yüz akçe mehr-i müeccelimden ve nafaka-i iddet-i mu‘ayyene-i ma‘lûmemden fâriğa olup ve me’ûnet-i süknâm dahi kendi üzerime olmak üzre zevcim mezkûr Mehmed Çelebi ile muhâla‘a-i sahîha-i şer‘iyye ile muhâla‘a olup, ol dahi ber vech-i muharrer hul‘-ı mezbûru kabûl ettiğinden sonra hukūk-ı zevciyyete müte‘allika âmme-i da‘vâdan her birimiz âharın zimmetini ibrâ-i âmm-ı râfi‘ü’l-hisâm ile ibrâ ve iskāt eyledik dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min Cumâdelâhire li sene isneteyn ve mi’e ve elf. Şuhûdü’l-hâl: Hasan Efendi b. Şaban el-imâm, Mustafa Çelebi b. Mehmed, Mehmed Çelebi b. Ahmed el-müezzin, Ali Beşe b. İbrahim, Mumcu Mehmed Beşe b. Ahmed, Yunus Beşe b. Hasan, Mehmed Çelebi b. Musa, İbrahim Çelebi Mehmed.