Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 53 Hüküm no: 3 Orijinal metin no: [2a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Bey b. Zülfikar’ın geri almak kaydıyla sattığı iki tarlasını Nikola v. Kosta’dan geri aldığı Dârü’l-hilâfeti’l-aliyye Kostantıniyyeti’l-mahmiye’de Derviş Ali Mahallesi ahâlîsinden işbu râfi‘u’l-kitâb Mehmed Bey b. Zülfikar nâm kimesne meclis-i şer‘-i şerîfde bi’l-fi‘il merhûm ve mağfûrun-leh Sultân Bâyezid Han evkāfının mütevellîsi olan umdetü’l-akrân Abdüllatif Efendi tarafından vekîl-i şer‘îsi Kâtib Mehmed Çelebi huzûrunda Nikola v. Kosta nâm zimmî muvâcehesinde üzerine da‘vâ ve takrîr-i kelâm edip mukaddemâ taht-ı tasarrufumda olup [Çekmece-i] Kübrâ’ya tâbi‘ İkşinoz nâm karyede vâki‘ bir tarafdan çeşme üstü ve bir tarafdan Kara Nikola tarlası ve bir tarafdan Ahmed nâm kimesne tarlası ve bir tarafdan tarîk-ı âm ile mahdû[d] tarla ve yine bir tarafdan mer‘â ve bir tarafdan Abdülbaki oğlu tarlası ve bir tarafdan Mehmed Efendi oğlu tarlası ve bir tarafdan tarîk-ı âm ile mahdûd tarla cem‘an tahmînen elli altı keyl tohum isti‘âb eder iki kıt‘a tarlamı târih-i kitâbdan [kitâb] senesi Şaban’ının yirminci günü merkūm Nikola’ya mütevellî-i mezkûr ma‘rifetiyle seksen dört esedî [2b] guruş bedel-i makbûz mukābelesinde tefvîz bi’l-vefâ ile ferâğ ve tefvîz ol dahi ber-vech-i muharrer tefevvüz ve kabûl etmeğin hâlâ suâl olunup medfû‘u olan bedel-i mezbûru ba‘de’l-kabz zikrolunan tarlalardan kasr-ı yed edip bana teslîme merkūm Nikola’ya tenbîh olunmak matlûbumdur dedikde gıbbe’s-suâl merkūm Nikola cevâbında zikr [olunan] tarlaları bana bâtten ferâğ ve tefvîz eyledi deyip ber-vech-i meşr[û]h bi-tarîkı’l-vefâ tefvîz eylediğini inkâr edicek müdde‘î-i mezbûrdan sıdk-ı makāline beyyine taleb olundukda udûl-i Müslimînden olup mahmiye-i mezbûrede Çukur Mahallesi imâmı olan Ahmed Efendi b. Hüseyin ve Yenikapı kurbünde Mustafa Paşa Mahallesi sükkânından Hasan Çelebi b. Mustafa nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müdde‘î-i mezbûr Mehmed Bey zikrolunan tarlaları târih-i mezbûrda mütevellî-i mezkûr ma‘rifetiyle merkūm Nikola’ya bedel-i medfû‘-ı mezbûr seksen dört guruş mukābelesinde tefvîz bi’l-vefâ ile bizim huzûrumuzda ferâğ ve tefvîz ol dahi minvâl-i muharrer üzre tefevvüz ve kabûl etmişidi biz bu husûsa bu vech üzre şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince bedel-i merkūmu ba‘de’l-ahz ve zikrolunan tarlalardan kasr-ı yed edip müdde‘î-i mezbûr Mehmed Bey’e teslîme merkūm Nikola’ya tenbîh birle mâ-vaka‘a bi’t-taleb ketb olundu. Fi’l-yevmi’l-hâmis aşer min-Şevvali’l-mükerrem li-sene tis‘în ve elf. Şuhûdü’l-hâl: Mehmed Çavuş b. Mehmed, Mehmed Bey b. Abdullah, Mustafa Beşe b. Mehmed, Hasan Çavuş b. Mustafa, Mustafa Beşe b. Mehmed, Veli Bey b. Hasan.