Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 54 Hüküm no: 4 Orijinal metin no: [2b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Abdullah ile kocası Berber Mustafa Çelebi’nin muhâlaa yoluyla boşandıkları Mahmiye-i İstanbul’da Fethiye Câmi‘i hareminde sâkine Hadîce bt. Abdullah nâm hatun meclis-i şer‘-i şerîfde zevc-i dâhili işbu bâ‘isü’l-kitâb Berber Mustafa Çelebi b. Abdünnebi mahzarında ikrâr ve takrîr-i kelâm edip zevcim mezbûr Mustafa Çelebi zimmetinde mütekarrir ve ma‘kūdün-aleyh mehr-i müeccelim olan bin beş yüz akçe <> üzerine ve nafaka-i iddet-i ma‘lûmem ve meûnet-i süknâm dahi kendi üzerime olmak üzre zevcim mezbûr Mustafa Çelebi ile muhâla‘a-i sahîha-i şer‘iye ile muhâla‘a edip ol dahi hul‘-ı mezbûru kabûl eylediğinden sonra hukūk-ı zevciyete ve zevciyet beynimizde kāim iken emrim ile âhara bey‘ ve istihlâk eylediği bir sîm ön kuşak ve bir çift sîm bilezik ve sâir ma‘lûme ve mechûle hukūka müte‘allika âmme-i da‘vâ ve mutâlebâtdan ben mezbûr Mustafa Çelebi’nin zimmetini ibrâ ve ıskāt edip ol dahi ber-vech-i muharrer benim zimmetimi ibrâ ve ıskāt eyledi dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâbi‘ aşer min-Şevvali’l-mükerrem li-sene tis‘în ve elf. Şuhûdü’l-hâl: Ni‘metullah Efendi b. Mehmed, Ömer Çelebi b. Ahmed el-müezzin, Hüseyin Efendi b. Hasan, Hüseyin Efendi b. Himmet.