Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 54 Hüküm no: 5 Orijinal metin no: [2b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Pürnek cemaatinden Kara Mustafa b. İbrahim’in Danişmendli cemaatinden Halil Bey tarafından öldürüldüğünün tescili Üsküdar Türkmân tâifesinin Pürnek cemâ‘atinden olup bundan akdem Konya kazâsına tâbi‘ Çiğili nâhiyesi sahrâsında maktûlen vefât eden Kara Mustafa b. İbrahim’in verâseti zevce-i metrûkesi Fâtıma bt. Mustafa nâm hatun ile sulbî sagīr oğlu Süleyman’a ve sulbiye sagīre kızı Sultân’a münhasıra olduğu şer‘an sâbit ve zâhir oldukdan sonra mezbûre Fâtıma asâleten ve sagīrân-ı mezbûrân Süleyman [ve] Sultâne’nin [Sultân’ın] li-ebeveyn ammileri ve kıbel-i şer‘den mansûb vasî olan Musa nâm kimesne ile vesâyeten meclis-i şer‘-i şerîf-i lâzımü’t-teşrîfde tâife-i mezbûrenin Danişmendli cemâ‘atinin kethudâsı olan Halil Bey b. Mehmed nâm kimesne mahzarında her biri üzerine da‘vâ ve takrîr-i kelâm edip târih-i kitâbdan dört buçuk ay mukaddem cemâ‘atimiz ile biz zikrolunan Çiğili nâhiyesi sahrâsında iken mezbûr Halil Bey yüz elli nefer cemâ‘atiyle gelip biz[im] cemâ‘atimizi basıp emvâl ve erzâkımızı nehb ü gāret eylediğinden mâ‘adâ mezbûr Halil Bey bir sîm kılıç ile mûrisimiz merkūm Kara Mustafa’yı alnından urup iki yerde mecrûh etmekle cerh-i mezbûrun te’sîrinden nâşî on yedi günde vefât etmişdir. Hâlâ mezbûr Halil Bey’e suâl olunup ihkāk-ı hak olunmak matlûbumuzdur dediklerinde gıbbe’s-suâl ve akībe’l-inkâr müdde‘iyyûn-ı mezbûrûndan müdde‘âlarını mübeyyine beyyine taleb olundukda udûl-i Müslimînden olup medîne-i Beyşehri ahâlîsinden es-Seyyid Ahmed Çelebi b. İbrahim, Şarkīpâre Türkmânının Beyceğizli cemâ‘atinden Ömer b. Ali nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka mezbûr Halil Bey târih-i kitâbdan dört buçuk ay mukaddem zikrolunan Çiğili nâhiyesi sahrâsında iki yüz nefer cemâ‘atiyle gelip mârrü’z-zikr Pürnek cemâ‘atini basıp emvâl ve erzâkların nehb ü gāret eylediğinden mâ‘adâ müdde‘iyyûn-ı mezbûrûnun mûrisleri mezbûr Kara Mustafa’yı bizim huzûrumuzda sîm kılıç ile alnından urup iki yerde mecrûh etmekle cerh-i mezbûrun [3a] te’sîrinden nâşî mezbûr Kara Mustafa on yedi günde vefât etmişdir biz bu husûsa bu vech üzre şâhidleriz şehâdet dahi ederiz deyü her biri edâ-yı şehâdet-i şer‘iye etdiklerinde ba‘de ta‘dîl ve’t-tezkiye şehâdetleri makbûle olmağın mûcebince ba‘de’l-hükm mâ-hüve’l-vâki‘ bi’t-taleb ketb olundu. Fi’l-yevmi’l-âşir min-Şevvali’l-mükerrem li-sene tis‘în ve elf. Şuhûdü’l-hâl: Ahmed Efendi Rûznâmçe, Mehmed Ağa Kethudâ-yı Hazret-i Efendi, Mehmed Çelebi b. Haydar, Ahmed Çelebi b. Piyale.