Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 55 Hüküm no: 6 Orijinal metin no: [3a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bayram b. Ali’ye sipahi Sinan b. Haydarşah tarafından bir ev yeri ve tarlanın tefviz edildiği Vilâyet-i Rumeli’nde Avlonya sancağında Iskırapar kazâsına tâbi‘ Sevran nâm karye arâzîsinin berat-ı âlî-şân ile sipâhisi olan Sinan b. Haydarşah meclis-i şer‘-i hatîr-i lâzımü’t-teşrîfde karye-i mezbûre ahâlîsinden işbu râfi‘u’l-kitâb Bayram b. Ali nâm kimesne mahzarında ikrâr ve takrîr-i kelâm edip karye-i mezbûre sınırı dâhilinde vâki‘ bir tarafdan Şahin Beşe oğlu menzili ve iki tarafdan tarîk-ı âm ve bir tarafdan dere ile mahdûd harâbe menzil [yer]i ve bir dönüm tarla karye-i mezbûrede sâkin iken bundan akdem vefât eden Osman nâm kimesnenin tasarrufunda olup bilâ-veled vefât etmekle tapusu benim yedimde olmağın hâlâ zikrolunan menzil yeri ve tarlayı mezbûr Bayram’a bin akçe bedel mukābelesinde tefvîz edip ol dahi tefevvüz ve kabûl eylediğinden sonra bedel-i merkūm bin akçeyi yedinden tamamen ahz ü kabz eyleyip mârrü’z-zikr menzil yeri ve tarlayı mahâllinde zabt ve tasarrufa merkūm Bayram’ı taslît eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmin aşer min-Şevvali’l-mükerrem li-sene tis‘în ve elf. Şuhûdü’l-hâl: Kasım Beşe b. Hüseyin, Ali b. Halil, Sinan b. Mehmed, Ahmed b. Süleyman, Mustafa b. Ali, Osman b. Şahin, Süleyman b. Ali, Mehmed Çelebi b. Haydar.