Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 56 Hüküm no: 7 Orijinal metin no: [3a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Beşe b. Ali’nin karısı Fâtıma Hatun’a borçlu olduğunun ispat edildiği Mahrûse-i Galata’da Yolcuoğlu Mahallesi’nde sâkine bâ‘isetü hâze’l-kitâb Fâtıma Hatun bt. el-Hâc İbrahim meclis-i şer‘-i şerîfde hâlâ zevci olan el-Hâc İsmail Beşe b. Ali <> nâm kimesne mahzarında üzerine da‘vâ ve takrîr-i kelâm edip zevcim mezbûr el-Hâc İsmail <> zimmetinde hudûdu beynimizde ma‘lûm menzil bahâsından bin esedî guruş ve mahrûse-i Bursa’da vâki‘ kezâlik beynimizde hudûdu ma‘lûm dükkânlar semeninden üç yüz esedî guruş min-haysü’l-mecmû‘ bin üç yüz esedî guruş hakkım olmağla hatta bin seksen dört senesi Şevvali’l-mükerremi’nde huzûr-ı Müslimînde mahalle-i mezbûrda vâki‘ menzilimde ber-vech-i mübeyyen bana bin üç yüz esedî guruş deyni olduğunu ikrâr ve işhâd dahi etmekle hâlâ meblağ-ı mezbûr bin üç yüz esedî guruşu zevcim mezbûr el-Hâc İsmail’den taleb ederim suâl olunsun dedikde gıbbe’s-suâl ve akībe’l-inkâr müdde‘iyye-i mezbûreden müdde‘âsını mübeyyine beyyine taleb olundukda udûl-i Müslimînden olup mahrûse-i mezbûrede el-Hâc A‘mâ Mahallesi’nde sâkin Ebûbekir Çelebi b. Mehmed ve zikrolunan Yolcuoğlu Mahallesi müezzini olan Mustafa Efendi b. Mehmed ve el-Hâc Osman b. el-Hâc Mehmed ve Ahmed Çelebi b. Mehmed ve el-Hâc Mehmed b. Yusuf ve el-Hâc İsmail b. Mustafa ve Abdülkadir b. Ali ve Abdullah Çelebi b. el-Hâc Mustafa nâm kimesneler li-ecli’ş-şehâde meclis-i şer‘a hâzırân [hâzırûn] olup istişhâd olunduklarında fi’l-hakīka mezbûr el-Hâc İsmail zevcesi müdde‘iyye-i mezbûre Fâtıma’ya zimmetinde beynlerinde ma‘lûm menzil bahâsından bin esedî guruş ve kezâlik Bursa’da vâki‘ dükkânlar bahâsından üç yüz esedî guruş cem‘an bin üç yüz esedî guruş deyni olduğunu bin seksen altı senesi Şevvali’l-mükerremi’nde müdde‘iyye-i mezbûrenin menzilinde bizim huzûrumuzda ikrâr ve bizi işhâd etmişidi, biz bu husûsa bu vech üzre şâhidleriz şehâdet dahi ederiz deyü her biri edâ-yı şehâdet-i şer‘iye etdiklerinde ba‘de’t-ta‘dîl ve’t-tezkiye şehâdetleri makbûle olmağın mûcebince meblağ-ı mezbûr bin üç yüz esedî guruş müdde‘iyye-i mezbûre Fâtıma’ya edâ ve teslîme zevci mezbûr el-Hâc İsmail’e tenbîh birle mâ-vaka‘a bi’t-taleb ketb olundu. Fi’l-yevmi’s-sâmin aşer min-Şevvali’l-mükerrem sene 1090. Şuhûdü’l-hâl: Mehmed Ağa-yı Kethudâ-yı Hazret-i Efendi, el-Hâc Mustafa b. Süleyman, Ahmed Efendi Rûznâmçe, Mumcu Mehmed Çelebi b. el-Hâc Mustafa, Mehmed Çelebi b. Haydar, el-Hâc İbrahim Efendi, Ahmed Çelebi [b.] Piyale, el-Hâc Mehmed Efendi b. el-Hâc Kasım.